Bıyl Aqmola oblysynda 15 myńnan astam merekelik is-shara ótedi

KÓKShETAÝ. KAZINFORM - 2024 jyly Aqmola oblysynda túrli ataýly kúnderge oraılastyrylǵan 15 myńnan astam is-shara ótedi.

Aqmola oblysy ishki saıasat basqarmasynyń basshysy Almas Alınniń málimetinshe, búginde óńirde is-sharalar jospary ázirlengen. Sondaı-aq, tarıhı tulǵalardyń esimderi jańa nysandarǵa, kóshelerge jáne mektepterge beriletin bolady.

«Bıyl 15 myńnan astam is-shara ótkizý josparlanyp otyr. Bıylǵy mereıtoılyq kúnderdiń tolyqtyǵyn eskere otyryp, ishki saıasat basqarmasy Joshy ulysynyń qurylǵanyna 800 jyl tolýyna oraı Halyqaralyq ǵylymı-praktıkalyq konferentsııa, Rahymjan Qoshqarbaevtyń 100 jyldyǵyna arnalǵan «Áskerge shaqyrylýshylar kúni» jastar arasynda áskerı qyzmetti dáripteý jónindegi is-shara, sondaı-aq, aqyn, jazýshy, qoǵam qaıratkeri Sáken Seıfýllınniń týǵanyna 130 jyldyǵyna arnalǵan ǵylymı-praktıkalyq konferentsııa sııaqty kóptegen iri is-sharalar men jobalardy júzege asyrý josparlanǵan», - deıdi Almas Alın.

Naýryz aıynda ǵalym, akademık Qanysh Sátpaevtyń 125 jyldyǵyna arnalǵan «Ǵylym jáne bıznes: óndiristik ınnovatsııalar» atty Halyqaralyq ǵylymı-praktıkalyq konferentsııa ótkizý josparda bar. Sonymen birge, qazaq jáne keńestik qoǵam qaıratkeri, kóp janrly jazýshy, qazaq tilindegi drama men romandardyń negizin qalaýshy, ǵalym, aǵartýshy Júsipbek Aımaýytovtyń 135 jyldyǵy aıasyndaǵy birqatar is-shara, aqyn, ánshi, kompozıtor Iran Tasqaraulynyń 85 jyldyǵyna arnalǵan ádebı kesh jáne aqyn, respýblıkalyq aqyndar odaǵynyń tuńǵysh prezıdenti, jyrshy Kóken Shákeevtiń 100 jyldyǵyna arnalǵan ádebı-mýzykalyq kesh ótkiziledi.

Osyndaı sharalar jyl sońyna deıin jalǵasady. Al sáýir aıynda Kókshetaý qalasynyń 200 jyldyǵy aıasynda bıyl atap ótiletin is-sharalar bastalady.

Aıta ketsek, budan buryn Asqar Zabıkýlınge Kókshetaýda eskertkish ornatylǵanyn jazǵan edik.