Bıyl 5 myńnan astam adam óz erkimen qonys aýdarý múmkindigin paıdalandy
ASTANA. KAZINFORM – 2025 jylǵy 1 qazandaǵy jaǵdaı boıynsha erikti qonys aýdarý sheńberinde jumys kúshiniń utqyrlyǵyn arttyrý úshin jumys kúshi artyq óńirlerden jumys kúshi tapshy óńirlerge 5 213 adam, onyń ishinde 1 725 qandas jáne 3 488 qonys aýdarýshy kóship keldi.
Barlyq qonys aýdarýshylarǵa memlekettik qoldaý sharalary kórsetildi. Osy jyldyń sońyna deıin 9 653 adamdy kóshirý josparlanýda.
Óńirler boıynsha: Pavlodar oblysyna – 1 886 adam, SQO – 1 516 adam, Qostanaı oblysyna – 575 adam, ShQO – 490 adam, Abaı oblysyna – 305 adam, Aqmola oblysyna – 257 adam, Atyraý oblysyna – 103 adam, Ulytaý oblysyna - 43 adam, Qaraǵandy oblysyna – 38 adam qonys aýdardy.
Qonystaný aımaqtaryna kóshken qandastarymyz negizinen Ózbekstannan – 612 adam, QHR – 563 adam, Mońǵolııadan – 377 adam, Reseıden – 84 adam, Túrkmenstannan - 49 adam jáne basqa elderden – 49 adam kelgen.
Eńbekke qabiletti jastaǵy 2 307 adam kelgenderdiń ishinen turaqty jumys oryndaryna 1 041 adam jumysqa ornalastyryldy, 38 adam kásipkerlik qyzmetpen aınalysady.
Qonys aýdarýshylar men kandastar densaýlyq saqtaý, aýyl sharýashylyǵy, bilim berý, ónerkásip jáne t.b. salalar boıynsha jumysqa ornalasty.
Qonys aýdarýdyń tabysty mysaldarynyń biri – Qurmeshovtar otbasy. Olar ómirlerindegi oń ózgeristerdi atap ótti.
«Biz Mańǵystaý oblysynan Qostanaı qalasyna kóship keldik. 2024 jyldyń mamyr aıynyń basynda Qostanaı qalasyndaǵy mansap ortalyǵyna júginip, qajetti keńester alyp, kvotaǵa ený úshin qajetti qujattar tizimimen tanystym. Aımaqtyq kvotaǵa engennen keıin biz kóshýge baılanysty materıaldyq kómek, sondaı-aq turǵyn úı jaldaý men kommýnaldyq qyzmetterge ketetin shyǵyndardy óteý úshin sýbsıdııa túrinde memlekettik qoldaý aldyq», – deıdi Qanat Qurmeshov.
Qanat Qurmeshovtiń «Aqparattyq júıeler» men «Dene shynyqtyrý jáne sport» mamandyqtary boıynsha joǵary bilimi bar. Jańa mekenge qonystanǵan soń, ol Vladımır Matvıenko atyndaǵy Olımpıadalyq rezervtiń balalar men jasóspirimder sport mektebine WKF karate boıynsha jattyqtyrýshy bolyp jumysqa ornalasty.
«Men – sanatsyz, biraq joǵary deńgeıli jattyqtyrýshymyn, eńbek ótilim – 8 jyl. Jubaıym Lázzat Orazmaǵanbet Turmaǵanbetuly atyndaǵy Mańǵystaý ındýstrıaldy-tehnıkalyq kolledjin «Munaı ónerkásibi» mamandyǵy boıynsha támamdaǵan. Ótken jyldyń tamyz aıynda ol «Bastaý bıznes» jobasyna qatysý úshin «Saqtaǵanova» JK ashyp, óz isin damytýǵa arnalǵan grantty sátti utyp aldy. Ol fıtnes-klýb ashty», – dep bólisti otaǵasy.
Onyń aıtýynsha, aǵymdaǵy jyly ol da óz kásibin – kondıterlik tseh ashýǵa 1 572 800 teńge kóleminde grant alǵan.
«Memleket tarapynan kórsetilgen qoldaý men usynylǵan múmkindikterdiń arqasynda otbasymyz jańa ortaǵa sátti beıimdelip, óz isimizdi bastaýǵa múmkindik aldyq. Osy mańyzdy qadamda bizge qoldaý kórsetken barlyq jandarǵa shyn júrekten alǵys aıtamyz», – dedi Qanat Qurmeshov.
Esterińizge sala keteıik, erikti qonys aýdarý aıasynda qonys aýdarýshylarǵa memlekettik qoldaýdyń mynadaı sharalary usynylady:
- otaǵasyna jáne otbasynyń árbir múshesine 70 AEK mólsherinde kóshýge arnalǵan bir rettik sýbsıdııa;
- otbasy músheleri sany men eldi mekenge baılanysty 15-ten 30 AEK-ke deıingi mólsherde 12 aı ishinde turǵyn úı jaldaýǵa jáne kommýnaldyq qyzmetterge aqy tóleýge aı saıynǵy sýbsıdııalaý;
- qysqa merzimdi kásiptik oqytýǵa joldama;
- jumysqa ornalasýǵa nemese kásipkerlik bastamany damytýǵa járdemdesý;
- ekonomıkalyq utqyrlyq sertıfıkattaryn berý.
Budan basqa, óńiraralyq qonys aýdarýǵa járdem kórsetetin jumys berýshilerge turǵyn úımen qamtamasyz etilgen jáne keminde 2 jyl merzimge turaqty jumysqa qabyldanǵan árbir qyzmetker úshin 400 AEK mólsherinde jumysqa ornalasýǵa birjolǵy sýbsıdııa beriledi.
Aıta keteıik, buǵan deıin SQO-ǵa qonys aýdarýshylarǵa qandaı qoldaý sharalary bar ekenin jazǵanbyz.