Bıyl 24 mln tonna astyq bastyrylady

ASTANA. KAZINFORM – Bıyl boljam boıynsha 24 mln tonna astyq bastyrylady. Bul týraly Úkimet otyrysynda Aýyl sharýashylyǵy mınıstri Aıdarbek Saparov aıtty.

- Qazir ýaqytta respýblıka boıynsha jappaı egin jınaý naýqany júrgizilýde. Al ońtústik óńirlerde aıaqtalýǵa jaqyn. Úkimet tarapynan jeńildetilgen qarjylandyrýdyń qajetti jaǵdaılary jasalyp, qolaıly aýa raıynyń arqasynda vegetatsııalyq kezeń sátti ótti. Jalpy egin jınaý alańy 23,6 mln gektardy quraıdy. Onyń ishinde 16 mln gektardan astamy – dándi jáne dándi-burshaqty daqyldar. Egin jınaý jumystary ýaqytyly bastalyp, ótken jylmen salystyrǵanda qarqyndy júrgizilýde, - dedi mınıstr.

Onyń dereginshe, búginde respýblıka boıynsha jalpy egin jınaý alańynyń 63,7 paıyzy jınaldy. Ortasha ónimdilik gektaryna 15,2 tsentnerdi qurady. 15,5 mln tonna astyq qambaǵa quıyldy.

- Ákimdikterdiń derekterine sáıkes, astyq boıynsha boljam 24 mln tonna deńgeıinde kútilýde. Bul ishki naryqtyń azyq-túlik, jem-shóp, tuqymdyq qajettiligin tolyq qamtamasyz etýge jáne eksport kólemin saqtaýǵa múmkindik beredi. Bul rette, astyqty teńiz porttaryna eksporttaý kezindegi shyǵyndardy óteýge sýbsıdııalaý merzimin uzartý – astyqty jańa naryqtarǵa shyǵarýǵa yqpal etedi, - dedi ol.

Mınıstrdiń aıtýynsha, qazirdiń ózinde 700 myń tonna maıly daqyldar jınaldy. Bıyl maıly daqyl tuqymynan shamamen 4 mln tonna ónim kútilýde. Bul rekordtyq kólem bolady.

- Sonymen qatar, 1,8 mln tonna kartop, 2,9 mln tonna kókónis, 2,2 mln tonna baqsha ónimderi jınaldy. Sharýalardyń úzdiksiz jumysyn 139 myń traktor, 31 myń astyq jınaıtyn kombaın, 17 myń oraq, sondaı-aq 130 myńnan astam basqa da tehnıka qamtamasyz etýde. Onyń ishinde 4 myńnan astam joǵary tehnologııaly Djon Dır jáne KLAAS kombaındary bar, - dedi Aıdarbek Saparov.

Aıta keteıik, otyrys qorytyndysy boıynsha ótetin baspasóz konferentsııasynda Aýyl sharýashylyǵy mınıstri Aıdarbek Saparov pen Saýda jáne ıntegratsııa mınıstri Arman Shaqqalıev BAQ ókilderi tarapynan týyndaǵan saýaldarǵa jaýap beredi.