Bıyl 13,7 mln tonna munaı ónimderi óndiriledi – Mınıstr

ASTANA. KAZINFORM – Qańtar-qyrkúıek aılarynda 11,6  mln tonna munaı ónimderi óndirildi nemese ótken jyldyń sáıkes kezeńimen salystyrǵanda 110,1% kórsetti. Bul týraly Energetıka mınıstri Erlan Aqkenjenov aıtty.

Mınıstrdiń aıtýynsha, 2025 jyldyń qorytyndysy boıynsha 13,7 mln tonna munaı ónimderin óndirý josparlanǵan. Bul 2024 jylmen salystyrǵanda 100,7% ósim kórsetedi.

– Munaı-gaz hımııasy ónimderin óndirý kólemi 477,2 myń tonna nemese ótken jyldyń sáıkes kezeńine qaraǵanda 115,8% qurady. Bıylǵy jospar – 589,7 myń tonna. Esepti kezeńde 89,9 mlrd kVtsaǵat elektr energııasy óndirildi. Osy jyldyń jospary – 117,9 mlrd kVtsaǵat, – dedi E.Aqkenjenov Úkimet otyrysynda.

Sonymen birge, 9 aıda jańartylatyn energııa kózderi obektilerinen 6,5 mlrd kVtsaǵat elektr energııasy óndirilgen. 2025 jylǵy jospar – 7,2 mlrd kVtsaǵat.

Aıta keteıik, jyl basynan beri 75,7 mln tonna munaı jáne gaz kondensaty óndirilgen. Osy jylǵa jospar – 96,2 mln tonna.

Úkimet otyrysynda 2025 jylǵy qańtar-qyrkúıek aılaryndaǵy áleýmettik-ekonomıkalyq damý qorytyndylary men respýblıkalyq bıýdjettiń atqarylý barysy talqylanyp jatyr.