Bıyl 112 jaıly mektep paıdalanýǵa beriledi

ASTANA. KAZINFORM — Bıyl «Jaıly mektep» jobasy aıasynda 112 mektep paıdalanýǵa beriledi. Bul týraly Ortalyq kommýnıkatsııalar qyzmetindegi brıfıngte Oqý-aǵartý mınıstri Ǵanı Beısembaev aıtty. 

— 2022 jyly Memleket basshysy Qazaqstan halqyna Joldaýynda «Jaıly mektep» ulttyq jobasyn júzege asyrýdy tapsyrdy. Byltyr aýqymdy qurylys jumysy bastaldy. Búginge deıin 105 mektep salyndy. Bıyl taǵy 112 mekteptiń qurylysy aıaqtalyp, iske qosylady. «Jaıly mektep» jobasy aıasynda eki jylda 460 myń oqýshy ornyna arnalǵan 217 zamanaýı mektep salynyp jatyr, — dedi mınıstr.

Onyń atap ótýinshe, Prezıdenttiń tapsyrmasymen iske asyrylyp jatqan «Jaıly mektep» jobasy qala men aýyl mektepteri arasyndaǵy alshaqtyqty joıýǵa baǵyttalǵan strategııalyq bastama.

— Jobanyń maqsaty — elimizdiń barlyq óńirinde kez kelgen balaǵa qoljetimdi jańa formattaǵy bilim berý uıymdaryn qurý. Joǵary sapaly bilim berý standarttaryn jappaı engizý arqyly, ár balanyń jan-jaqty damýyna jáne óz áleýetin tolyq ashýǵa teńdeı múmkindikter jasaý, — dedi Ǵanı Beısembaev.

Buǵan deıin 2024–2025 oqý jylynyń basynan bastap «Jaıly mektep» jobasy aıasynda 254 myń oqýshy orny paıdalanýǵa berilgenin jazǵan edik.