Bıg Shanhaıdaǵy órt: Japa shekken kásipkerlerdiń nesıesi keıinge shegerile me
ASTANA. KAZINFORM – Búgin tańǵy saǵat 3 shamasynda elordada úsh qabatty bazar ǵımaraty órtke oranǵan edi. Oǵıǵanyń sebebi áli de anyqtalyp jatyr.
Jaýaptylar kásipkerlerdiń nesıesi men salyq esebin keıinge shegerý máselesi boıynsha tıisti mekemelermen kelissóz júrgizip jatqandaryn aıtady.
- Búgingi basty mindetimiz – zardap shekken kásipkerlerge kúndelikti jumys barysynda jıi baılanysatyn negizgi uıymdarmen qajetti máselelerin sheshýge kómektesý. Olar ekinshi deńgeıli bankter men salyq organdary. Mysaly, aldaǵy ýaqytta olar qarjylyq eseptilikti tapsyrý, aı saıynǵy tólemder jasaý nemese aınalym qarajatyn tolyqtyrý kezinde qıyndyqtarǵa tap bolýy múmkin. Osyndaı jaǵdaıda kásipkerlerge jan-jaqty qoldaý kórsetilýi kerek, - deıdi Astana qalasynyń Investıtsııalar jáne kásipkerlikti damytý basqarmasynyń basshysy Halel Ákimjanov Kazinform tilshisine bergen suhbatynda.
Bul máseleni sheshý úshin kásipkerlerge zardap shekkenin dáleldeıtin arnaıy anyqtama beriledi.
- Bazar aýmaǵynda jalǵa alý sharty negizinde jumys isteıtin kásipkerlerdiń sany 100-den asady. Qazirgi ýaqytta olarǵa túsindirý jumystaryn júrgizip jatyrmyz. Zardap shekkender jalǵa alý shartyn, eger zańdy tulǵa bolsa, memlekettik tirkeý nemese qaıta tirkeý týraly qujatty bizge usynyp, ótinish jazý kerek. Ótinish túskennen keıin 15 jumys kúni ishinde jaýap beremiz. Eger barlyq qujattary tolyq ári durys bolsa, kásipkerge resmı anyqtamany tabystaımyz. Bul qujatty salyq organdary men bankterge resmı túrde júginý úshin paıdalana alady. Qazirgi tańda 50-den astam kásipker ótinish berip úlgerdi, - deıdi Baıqońyr aýdany Tótenshe jaǵdaılar basqarmasynyń bas mamany Aıan Qantek.
Al kásipkerlerdiń ózi bazar ishindegi jaǵdaıdan habarsyz. Tipti qansha shyǵyn kelgeni týraly aqparatty da bile almaı otyr.
– Meniń nan satatyn dúńgirshegim bar edi. Órt kezinde onyń ishindegi aqsha da, taýar da – bári janyp ketti. Qazir ishke kirip, naqty jaǵdaıdy kóre almaı otyrmyz. Biraq órt sóndirýshiler ishi kúlge aınalyp ketti dedi. Ákimdik tarapynan qandaı naqty sharalar qabyldanatyny belgisiz. Biz ázirshe ótinish jazyp tapsyrdyq, - deıdi kásipker Nurgúl Mahanova.
Eske sala keteıik, buǵan deıin zardap shekken kásipkerlerge qandaı qoldaý kórsetiletini týraly jazǵan edik.