«Bıg Shanhaı» bazaryndaǵy órttiń sebebi qashan anyqtalady

ASTANA. KAZINFORM — Elordadaǵy úsh qabatty «Bıg Shanhaı» bazarynan shyqqan órttiń sebebi áli anyqtalyp jatyr. Bul týraly Tótenshe jaǵdaılar vıtse-mınıstri Kegen Tursynbaev málim etti.

— Tańǵy saǵat 3-te № 7 órt sóndirý beketiniń qyzmetkerleri kórip, ózderi bardy. Ýaqytty jiberip alǵan, biz kelgende bazar ishi órtengen, bir jaq sheti qulap jatty. Órt sóndirýshiler keshki saǵat 18:00–ge deıin jumys istedi. Qasyndaǵy «Orda» bazaryn alyp qaldy. Aýdıt boıynsha eshqandaı kemshilik joq degen, sondyqtan aýdıt bolǵandyqtan teksergen joqpyz, — dep qysqa qaıyrdy Kegen Tursynbaev Úkimet úıinde ótken baspasóz máslıhatynda.

Onyń aıtýynsha, atalǵan jaıt boıynsha is qozǵaldy. 

— Saraptama aıdyń aıaǵyna deıin daıyn bolý kerek, sol kezde órttiń sebebi belgili bolady. 2020-2023 jyldary maratorıı boldy, sondyqtan biz iri saýda úılerin teksergen joqpyz. Bıyl 63 iri saýda ortalyǵyn tekserdik, onyń nátıjesinde 941 órt qaýipsizdigin buzý faktileri anyqtaldy, — deıdi ol.

Birer kún buryn «Bıg Shanhaı» bazaryndaǵy órtten kásipkerlerge kelgen shyǵynnyń áli eseptelip jatqanyn habarlaǵan edik. 

Eske salsaq, 18 shildede Astanada «Bıg Shanhaı» úsh qabatty bazary órtke orandy.