Beıjińde 8 robot energııa blogyn jetkizý saparyn Uly Qytaı qorǵanynan bastady
ASTANA. KAZINFORM — 15 shildede «Bolashaqty energııamen jaryqtandyrý» taqyrybymen ótetin Álemdik gýmanoıdty robottar sporttyq jarysynyń ashylý saltanaty Beıjińde uıymdastyrylmaq, dep habarlaıdy Qytaıdyń CCTV telearnasy.
Osyǵan oraı Badalınde ornalasqan Vantszın mádenı alańynda «Robottardyń energııa blogyn jetkizý» atty erekshe is-shara bastaldy.
Bul is-shara Qytaıda jasalǵan 8 ozyq gýmanoıdty robottyń Uly Qytaı qorǵanyna shyǵyp, tehnologııanyń muragerligin beıneleıtin «energııa blogyn» jetkizýimen erekshelendi. Jarysqa arnalǵan «energııa jetkizý» serııaly is-sharalary 14 tamyzda bastalatyn sporttyq jarystyń ashylýyna deıin jalǵasady.
Іs-shara robottar tobynyń «energııa blogyn» alyp, Beıjińniń mádenı muralary men belgili nysandaryn aralaýy túrinde ótedi. Energııa blogyn jetkizýdiń sońǵy núktesi jarystyń negizgi arenasy — Olımpıadalyq ulttyq konkı tebý stadıony bolmaq.
Barlyq energııa blogy jınalǵan soń, olar «aqyl-oı ózegi» dep atalatyn biryńǵaı qurylymǵa biriktirilip, jarystyń ashylý saltanatynda jaryqtandyrylady. Bul «aqyl-oı ózegi» jarys barysynda úzdiksiz janyp, jabylý saltanatyna deıin jalǵasady.
Olımpıadalyq alaýdy jetkizýge uqsas sımvoldyq maǵynadan bólek, «aqyl-oı ózegi» bolashaq jarystarda robottardyń derekteri men estelikterin saqtap, gýmanoıdty robottardyń evolıýtsııalyq tarıhyn beıneleıtin naqty nysanǵa aınalady.
2025 jylǵy Álemdik gýmanoıdty robottar rporttyq jarysy Beıjiń qalasynyń úkimeti jáne Ortalyq radıo men teledıdar bas basqarmasy sııaqty uıymdardyń birlesken qoldaýymen ótedi. Bul — gýmanoıdty robottar qatysatyn álemdegi alǵashqy keshendi jarys jáne 14-17 tamyz aralyǵynda Beıjińde uıymdastyrylady. Jarys negizgi jáne qosymsha básekelerge bólinip, jalpy 21 túrli saıysty qamtıdy.
Jarysty uıymdastyrýshylardyń málimdeýinshe, álemdegi alǵashqy gýmanoıdty robottardyń álemdik jarysy — ǵalamdyq jetekshi tehnologııalardy, ınjenerlik ónerdi jáne sporttyq rýhty biriktiretin eń joǵary deńgeıdegi shara.
Qytaı básekelestik kórsetilim alańyn qurý, jarys synaqtary men shynaıy stsenarıılerde testileý arqyly gýmanoıdty robottar tehnologııasynyń jyldam damýyn yntalandyrýdy jáne olardyń adam ómirine tezirek ári tıimdi enýin maqsat etedi.
Budan buryn Qytaı áskerı jattyǵýlarǵa robottardy paıdalanyp kórgenin jazǵan edik.