Beıjiń AQSh-ty Taıvanmen resmı baılanystardy toqtatýǵa shaqyrdy

ASTANA. KAZINFORM — Qytaı kez kelgen túrde AQSh pen Taıvan arasyndaǵy resmı baılanystarǵa úzildi-kesildi qarsy ekenin málimdep, Vashıngtondy aralmen resmı qarym-qatynasty dereý toqtatýǵa shaqyrdy. Bul týraly QHR SІM resmı ókili Lın Tszıan aıtty, dep habarlaıdy Sınhýa.

Buǵan deıin AQSh prezıdenti Donald Tramptyń Memlekettik departamentke Taıvanmen qarym-qatynasty qaıta qarap, aralmen baılanystardy tereńdetý jóninde zańǵa qol qoıǵany belgili bolǵan.

Bul aqparatqa túsinikteme berýdi suraǵanda, Lın Tszıan Qytaıdyń ustanymy aıqyn ári ózgermeıtinin atap ótti. AQSh pen Taıvan arasyndaǵy kez kelgen resmı baılanysqa Qytaı túbegeıli qarsy. Onyń aıtýynsha, Taıvan máselesi Qytaıdyń negizgi múddeleriniń ózeginde tur jáne Qytaı men AQSh arasyndaǵy qarym-qatynastaǵy «birinshi qyzyl syzyq» bolyp sanalady.

Qytaı dıplomaty sondaı-aq «bir Qytaı» qaǵıdaty eki el arasyndaǵy dıplomatııalyq qatynastardyń saıası negizi ekenin eske saldy. AQSh-tyń QHR-men dıplomatııalyq qatynastar ornatý týraly birlesken kommıýnıkesinde «Amerıka Qurama Shtattary Qytaı Halyq Respýblıkasynyń úkimetin Qytaıdyń jalǵyz zańdy úkimeti retinde moıyndaıdy. Osy kontekste AQSh halqy Taıvan halqymen mádenı, saýda jáne ózge de beıresmı baılanystardy qoldaıdy» dep naqty kórsetilgen.

-Qytaı tarapy amerıkalyqtardy «bir Qytaı» qaǵıdatyn jáne Qytaı men AQSh arasyndaǵy úsh birlesken kommıýnıkeniń talaptaryn adal oryndaýǵa, Taıvan máselesine asa saqtyqpen qaraýǵa, Taıvanmen resmı baılanystardy toqtatýǵa shaqyrady, - dedi QHR SІM ókili.

Aıta keteıik, AQSh-tyń Qytaıdan eń kóp nesıe alatyny anyqtaldy.