Beıjińde ótken SІM-niń keńesinde ShYU Astana sammıti sóz boldy

BEIJІŃ. QazAqparat - 27-28 sáýirde Beıjińde Shanhaı yntymaqtastyq uıymynyń (ShYU) shtab-páterinde qazaqstandyq taraptyń tóraǵalyǵymen «ShYU qyzmetin aqparattyq súıemeldeý úderisinde syrtqy ister mınıstrlikteriniń aqparattyq qyzmetteriniń ózara is-qımyly týraly» Syrtqy ister mınıstrlikteri (SІM) aralyq konsýltatsııalar ótti, dep habarlady Qytaıdaǵy «QazAqparat» HAA menshikti tilshisi.

Konsýltatsııa barysynda taraptar Uıymnyń qyzmetin aqparattyq súımeldeý salasyndaǵy ShYU-ǵa múshe memleketterdiń SІM aqparattyq qyzmetteriniń yntymaqtastyǵyn tereńdetýdiń odan ári joldary týraly pikir almasty. Sondaı-aq ótken jylǵy aqparattyq jumys boıynsha ShYU Hatshylyǵynyń esebi tyńdaldy.



Konsýltatsııa barysynda 2017 jyly maýsymda Astanada ótetin ShYU-ǵa múshe memleket basshylary Keńesiniń otyrysyn aqparattyq súıemeldeý boıynsha birlesken jumysqa basa nazar aýdaryldy.



«Qazaqstan Respýblıkasy óziniń tóraǵalyǵy aıasynda jahandyq medıa-keńistikte ShYU-ǵa jaǵdaı jasaý boıynsha birlesken aqparattyq jumysqa erekshe mán beredi. El astanasynda ótetin iri saıası sharaǵa belsendi daıyndyq júrip jatyr: ShYU sammıtiniń baspasóz ortalyǵyn ashý sheshimi qabyldandy, buqaralyq aqparat quraldarynyń barlyq ókilderiniń jaıly da jemisti jumys jasaýy úshin qajetti jaǵdaıdyń bári jasalady. ShYU astanalyq sammıti álemge Uıymnyń ıgi maqsattary men mindetterin kórsetýi tıis», - dedi konsýltatsııaǵa tóraǵalyq etken Qazaqstan SІM Halyqaralyq aqparat komıteti tóraǵasynyń orynbasary Dınara Jeldibaeva.