Beıjińde Naýryz meıramy toılandy

NUR-SULTAN. QazAqparat - Qazaqstannyń Qytaıdaǵy Elshiliginde jaqsylyqtyń jarshysy, izgilik pen berekeniń bastaýy, kóktem men jańarý merekesi, Ulystyń uly kúni - Naýryz meıramyn dástúrli túrde atap ótti, dep habarlaıdy QazAqparat QR Syrtqy ister mınıstrliginiń baspasóz qyzmetine silteme jasap.

Merekege Beıjińdegi qazaq eliniń dıplomattary men olardyń otbasy músheleri, Shanhaı Yntymaqtastyq Uıymy Hatshylyǵynyń jáne Qazaqstan ulttyq kompanııalary ókildikteriniń qyzmetkerleri, sondaı-aq Qytaıdaǵy qazaq dıasporasynyń ókilderi jáne Qytaı joǵary oqý oryndarynda bilim alyp jatqan qazaqstandyq stýdentter qatysty.

Óziniń alǵy sózinde Qazaqstannyń Elshisi Ǵabıt Qoıshybaev qalyń jurtshylyqqa Naýryz merekesiniń kópǵasyrlyq murasyna toqtalyp, Samarqannyń kók tasy erip, qara jer býsanǵan, adamzatqa baq pen dáýlet, qut pen bereke ákelgen, jańarý men jasarýdyń merekesi ǵana emes, Naýryz meıramy sonymen qatar halyqtar men rýhanı mádenıetti biriktirýshi, beıbitshilik pen birlikti, tatýlyqty saqtaýshy, adamdardyń jaqsylyq pen jarqyn bolashaqqa degen senimi ekenin basa aıtty.

Saltanatty shara aıasynda qazaqstandyq dıplomatııalyq mıssııa basshysy ShYU Bas hatshysynyń orynbasary Erik Áshimov pen ShYU Hatshylyǵy janyndaǵy QR Turaqty ókili Nurlan Aqqoshqarovqa halyqaralyq arenada Qazaqstannyń múddesin qorǵaýǵa jáne ilgeriletýge qosqan úlesi úshin «Qazaqstan Táýelsizdigine 30 jyl» mereıtoılyq medaldaryn tabys etti.

Іs-sharanyń naǵyz «injý-marjany» qazaqstandyq dıplomatııa ókildigi janyndaǵy Qoǵamdyq keńes uıymdastyrǵan merekelik kontsert boldy. Beıjińde jumys isteıtin dıplomattar men qazaqstandyqtardyń balalary bı bılep, ánnen shashý shashty. Kishkentaı ártisterdiń oryndaýyndaǵy «Naýryz», «Atameken», «Men qazaqpyn» sııaqty qazaq ánderi, «Qamajaı», «Tulpar» ı «Qazaq bıi» syndy bıleri jınalǵan qaýymǵa erekshe kóńil-kúı syılady. Sonymen qatar asyq atý, arqan tartý, toǵyzqumalaq sııaqty ulttyq sport oıyndary kópshiliktiń kóńilinen shyqty.