Beıjiń-2022: Búgingi shyqqan bıigimiz - shırek fınal
Tórt sporttan 8 sportshymyz jarys alańyna shyqty.
Atap aıtsaq, búgin jarys alańyna birinshi bolyp erler arasynda shańǵy jarysynan klassıkalyq stılden 15 shaqyrymdyq báseke de Vıtalıı Pýhkalo men Evgenıı Velıchko shyqty.
Jarys nátıjesi boıynsha jalpy jarys jolyna shyqqan 99 shańǵyshylar arasynan Vıtalıı Pýhkalo márege 25-shi, al Evgenıı Velıchko 40-shy bolyp jetti.
Jerlesterimiz Pýhkalo tıisti qashyqtyqty 40:39:6 ýaqytta baǵyndyrsa, Velıchko 41:27:3 ýaqytta júrip ótti.
Bul dodanyń bas júldesin fınlıandııalyq Iıvo Nıskanen jeńip aldy.
Kúmisti reseılik Aleksandr Bolshýnov qanjyǵasyna baılasa, úzdik úshtikti norvegııalyq Iohannes Klebo enshilep Beıjiń olımpıadasynyń qola júldegeri atandy.
Odan keıin bıatlonnan áıelder arasyndaǵy sprınt jarysy bastaldy.
Baǵdarlamanyń bul túrinde Qazaqstan atynan jalǵyz Galına Vıshnevskaıa-Sheporenko el namysyn qorǵady.
Ókinishke qaraı otandasymyz jalpy esepte jarysqa qatysqan 60 sportshynyń ishinen 52-shi orynǵa ıe boldy.
Jerlesimiz jeńimpazdan +2:38,3 (1+0) mınýtqa qalyp qoıdy.
Atalǵan synda Beıjiń olımpıdasynyń altyn medalin Norvegııa sportshysy qanjyǵasyna baılady.
Kúmis medalge Shvetsııa bıatlonshysy qol jetkizse, úzdik úshtikti ıtalııalyq atlet túıindedi.
Odan keıingi kezek qazaqstandyq short-trekshilerge de kelip jetti. 500 metr qashyqtyqta el namysyn bir emes úsh atletimiz qorǵady.
Nátıjesinde úsheýi de alǵashqy irikteý synynan súrinbeı ótip, shırek fınaldyq básekge joldama aldy.
Jerlesterimiz arasynan muz aıdynǵa birinshi bolyp shyqqan Ádil Ǵalıahmetov 500 metrdi 40,74 sekýndta júgirip ótse, Denıs Nıkısha 40,482 sekýndta baǵyndyryp shırek fınalǵa joldama aldy.
Al Abzal Ájiǵalıev atalǵan qashyqtyqty 40.87 sekýndta baǵyndyrdy.
Ǵalıahmetov óz tobynda ekinshi orynǵa taban tirese, Nıkısha men Ájiǵalıev birinshi orynnan kórindi.
Osylaısha, qazaqstandyq sportshylar avtomatty túrde kelesi kezeńge ótti.
Endi short-trekshilerimiz shırek fınal, jartylaı fınal jáne fınal kezeńderin 13 aqpanda ótkizedi.
Short-trekshilerimizdiń sátti jeńisinen keıin, ile-shala úlken tramplınnen sekirýden irikteý jarysynyń nátıjeleri de anyqtaldy.
Bul sport túrinen el namysyn Danııl Vasılev pen Sergeı Tkachenko qoǵaǵan bolatyn. Ókinishke qaraı, ekeýi de úmitti aqtaı almady.
Naqtyraq aıtsaq, ekeýi de kelesi kezeńge joldama alatyn 50 sportshynyń qataryna ilige almady.
Vasılev 69.4 upaımen (103 m) 51-orynǵa ıe bolsa, Tkachenko 54-orynǵa (60,7 upaı, 98,5 m) taban tiredi.
Endigi úmit - erteńgi jarys jolyna shyǵatyn sportshylarymyzda.
