Beırýttegi jarylys isi: Bolgarııada reseılik keme ıesi qamaýǵa alyndy

ASTANA. KAZINFORM – Bolgarııada Beırýt portyndaǵy jarylysqa baılanysty reseılik keme ıesi ustaldy. Bul is 2020 jyly bolǵan iri tehnogendik apatqa qatysty tergeý aıasynda júrip jatyr.

Reseılik Igor Grechýshkın – ammıak selıtrasyn jetkizgen júk kemesiniń ıesi. Ol Interpoldyń orderi boıynsha ustalǵan. Lıvandyq tergeý sýdıasy oǵan jáne keme kapıtany Borıs Prokoshevke izdeý jarııalaǵan bolatyn.

Lıvan sot organdarynyń málimetinshe, Grechýshkın ótken aptada Kıprden ushyp kelgen soń Sofııa áýejaıynda qolǵa túsken. Qazirgi tańda ony Lıvanǵa ekstradıtsııalaý qujattary daıyndalyp jatyr. Eger ekstradıtsııa múmkin bolmasa, lıvandyq tergeýshiler Bolgarııaǵa baryp, jaýap alý múmkindigin qarastyrady.

Igor Grechýshkın Reseı azamaty bolýmen qatar, Kıpr azamattyǵyna da ıe.

2020 jylǵy 4 tamyzda Beırýt portynda 2700 tonna ammıak selıtrasy jarylyp, 200-den astam adam qaza tapty, myńdaǵan turǵyn jaraqat aldy. Jarylystyń saldarynan 10 shaqyrym radıýstaǵy ǵımarattar qırap, Qazaqstannyń dıplomatııalyq ókildigi ornalasqan ǵımarat ta zaqymdandy. Bul apat HHІ ǵasyrdaǵy eń iri ıadrolyq emes jarylystardyń biri retinde tarıhqa endi.

Alaıda búginge deıin Lıvannyń birde-bir joǵary laýazymdy sheneýnigi jaýapqa tartylǵan joq. Jarylys el ekonomıkasy kúıregen shaqta oryn alǵan edi. Dúnıejúzilik bank ony «zamanaýı tarıhtaǵy eń aýyr daǵdarystardyń biri» dep baǵalady. Qoǵam bılik elıtasyn jemqorlyq pen jaýapsyzdyq úshin synǵa aldy.

2025 jyly Lıvanda prezıdent Djozef Aýn, premer-mınıstr Navaf Salam bastaǵan jańa úkimet quryldy. Olar jarylysty tergeýdi sońyna jetkizip, kinálilerdi jaýapqa tartýǵa ýáde berdi.

Tergeý alǵashqy kúnderden-aq saıası jáne quqyqtyq qysymdarǵa baılanysty toqtap qala berdi. 2020 jyly jetekshi tergeýshi Fadı Savan eks-premer Hasan Dıab pen úsh mınıstrdi nemquraılylyqqa aıyptaǵanymen, kóp uzamaı qyzmetinen shettetildi. Al bıyl shildede tergeý sýdıasy Tarek Bıtar isti qaıta jandandyrdy.