Beırýtke jasalǵan jappaı soqqy: Izraıldiń kózdegeni kim ekeni aıtyldy

ASTANA.KAZINFORM - Izraıl beısenbi kúni tún ortasy shamasynda Beırýttiń ońtústigindegi «Hezbolla» jetekshisi Hasan Nasrallanyń muragerine qarsy kúshti áýe shabýylyn jasady. Bul Nasralla qaza tapqannan keıin bir aptadan keıin boldy.

Soqqy nysanasy Hashem Safı ad-Dın boldy, dep habarlaıdy Axios jáne The New York Times.

Sonymen birge The New York Times Izraıldiń úsh sheneýnigine silteme jasaı otyryp, soqqy kezinde Hashem Safı ad-Dın jerasty býnkerinde "Hezbollanyń" basqa da joǵary laýazymdy jetekshilerimen kezdesýge qatysqanyn habarlady.

"Hezbollaǵa" jaqyn derekkózderdiń habarlaýynsha, Beırýttiń ońtústigindegi Hezbollanyń qorǵany retinde belgili Dahıe aımaǵyna barlyǵy 11 áýe bombasy laqtyrylǵan.

Lıvannyń resmı Ulttyq aqparat agenttigi (NNA): «Osy ýaqytqa deıin qatarynan 10-nan astam soqqy tirkeldi, bul Lıvandaǵy Izraıl soǵysy bastalǵannan bergi Beırýttyń ońtústik shetindegi eń kúshti shabýyldardyń biri boldy» dep habarlady.

Lıvan armııasynyń málimetinshe, Beırýttan tys taýly aımaqtarǵa da soqqy jasalǵan.

Safı ad-Dınniń soqqydan jaraqat alǵany nemese almaǵany ázirge belgisiz, Izraıl bul týraly ázirge túsinik bergen joq. «Hezbolladan» da ázirge eshqandaı habar joq. Belgili bolǵany, bul soqqy bir apta buryn «Hezbolla» jetekshisi Hasan Nasrallany óltirgen soqqydan da kúshtirek boldy.

Atqarýshy keńestiń basshysy retinde Hashem Safı «Hezbolla» uıymynyń saıası isterin qadaǵalaıdy.

Safıeddın "Hezbollanyń" atqarýshy keńesin basqarýmen qatar, toptyń Konsýltatıvtik keńesiniń (Shýra) negizgi múshesi jáne onyń Jıhad keńesiniń basshysy qyzmetin atqarady.

Bul soqqy Izraıl qorǵanys kúshteri Lıvannyń ońtústigindegi qurlyqtaǵy operatsııalaryn keńeıtken kezde jasaldy.