Beıonse resmı túrde mıllıarder atandy
Beıonse resmı túrde mıllıarder atanyp, zamanaýı mýzykadaǵy eń yqpaldy tulǵalardyń biri retindegi mártebesin taǵy bir márte dáleldedi. Osylaısha ol asa az topqa kiretin baı mýzykanttar qataryna qosyldy. Bul týraly Daily Mail-ge silteme jasap, Kazinform agenttiginiń menshikti tilshisi habarlady.
Forbes derekterine sáıkes, 44 jastaǵy sýperjuldyz mıllıarder atanǵan bes mýzykanttyń biri boldy. Bul tizimde onyń jubaıy Jay-Z de bar — onyń baılyǵy 2,5–2,6 mlrd dollar shamasynda baǵalanady. Sonymen qatar bul qatarda Teılor Svıft, Brıýs Sprıngstın jáne Rıanna bar.
Beıonseniń 2023 jylǵy Renaissance atty álemdik týrnesi onyń mansabyndaǵy eń iri jetistikterdiń biri sanalady. Atalǵan týrne shamamen 600 mıllıon dollar tabys ákelip, tarıhtaǵy eń tabysty kontserttik týrlardyń birine aınaldy.
2024 jyly Beıonse óziniń alǵashqy kantrı janryndaǵy Cowboy Carter albomyn shyǵardy. Bul joba oǵan jańa kommertsııalyq múmkindikter ashty. Sonyń ishinde — Rojdestvo merekesinde Ulttyq fýtbol lıgasynyń (NFL) taım-breık shoýynda óner kórsetý jáne 2025 jylǵy eń tabysty kontserttik týrdyń qatysýshysy bolý múmkindigi bar.
Degenmen, Beıonseniń baılyǵynyń negizgi bóligi on jyldan astam ýaqyt buryn qabyldaǵan mańyzdy bıznes sheshimine baılanysty.
2010 jyly ol Parkwood Entertainment kompanııasyn quryp, óz mansabynyń derlik baǵytyn tolyqtaı óz baqylaýyna aldy.
— Men menedjmentti óz qolyma alýǵa sheshim qabyldaǵanda, iri basqarýshy kompanııalarǵa júgingim kelmedi. Men Madonnanyń jolyn qýyp, yqpaldy bolýdy, óz ımperııamdy qurýdy jáne basqa áıelderge: eger sen mansapta belgili bir deńgeıge jetseń, mindetti túrde bireýmen kelisimshartqa otyryp, tabysyń men jetistigińdi bólisýdiń qajeti joq ekenin kórsetkim keldi, — degen edi Beıonse 2013 jylǵy suhbatynda.
Ánshi birneshe túrli jobamen aınalysqanyna qaramastan, Forbes málimetinshe, onyń baılyǵynyń negizgi bóligi áli de mýzykamen tyǵyz baılanysty.
Óziniń avtorlyq jazbalaryna menshik quqyǵyn saqtaı otyryp jáne álemdi aralap gastroldik saparlarǵa shyǵý arqyly Beıonse mýzykalyq katalogynan mol tabys tabýdy jalǵastyryp keledi.
Buǵan deıin álemdegi dollarlyq mıllıarderler sany rekordtyq deńgeıge jetkeni habarlanǵan bolatyn.