Beıneýlik 6 balanyń anasy óz týǵan kúninde daýys berdi

Mańǵystaý oblysy Beıneý aýdanynyń turǵyny, 6 balanyń anasy Nurgúl Bólebaeva óz týǵan kúninde tańdaýyn jasap, aýdan bolashaǵy úshin daýys berdi, dep habarlaıdy Kazinform.

Nurgúl Bólebaeva 1990 jyly 5 qarashada dúnıege kelgen. «Kúıken» orta mektebinde 11 jyldan beri ustazdyq qyzmet etedi. Kópbalaly jas ana bolashaq aýdan ákimine artar úmiti zor ekenin aıtady.

- Saılaý meniń týǵan kúnimmen tuspa-tus kelgeni qýantty. Endigi tilegim aýdanymyzdy kórkeıtetin, óz isine adal, halyqty qoldaıtyn ákim kelse eken deımin. Barlyq úmitkerlerge tek sáttilik tileımin! - dedi Nurgúl Bólebaeva.

Aıta keteıik, elimizde aýdan, qala ákimderiniń saılaýy alǵash ret ótip jatyr. Al Mańǵystaýda Beıneý aýdanynda ǵana ákim saılaýy ótip jatyr. 

Beıneýdegi saılaý ýchaskelerinde daýys berý qarqyny joǵary. №121 saılaý ýchaskesinde 1 saǵatta 25 turǵyn daýys berip úlgergen.