Beınetaspaǵa túsirip, jaýap aldy: Kásipkerler salyq organdarynyń ilki jobasyna narazy
Atalǵan másele boıynsha Nur-Sultan qalasynyń kásipkerler palatasynyń Kásipkerlerdiń quqyqtaryn qorǵaý jáne sybaılas jemqorlyqqa qarsy is-qımyl jónindegi keńesi otyrys ótkizdi.
ShOB kásipkerleri shottar men elektrondy shot-faktýralardyń aqparattyq júıelerin negizsiz buǵattaýǵa jáne áriptesterine olardyń bıznesiniń joǵary táýekeli týraly habarlama jiberilip, iskerlik bedeline nuqsan keldi dep shaǵymdanýda. Bul jumysty Memlekettik kirister departamenti qosymsha qun salyǵyn ákimshilendirýdi jetildirý jónindegi pılottyq joba aıasynda júrgizýde.
Atalǵan joba kóleńkeli ekonomıka deńgeıin tómendetý jáne salyq tóleýden jaltarýdy kózdeıtin bir kúndik fırmalar tarapynan salyqtyq buzýshylyqtardyń aldyn alý, adal kásipkerlerdi olardan qorǵaý, «bir kúndik fırmalar» usynatyn kóleńkeli qyzmetter naryǵyn joıý maqsatynda ázirlengen.
«Buıryqtyń ózi óte minsiz jazylǵan, onda barlyq merzimder kórsetilgen, kásipker salyq organy bergen habarlamalarǵa jaýap bere alady jáne ony salyq organynyń bes kúnde qaraýyna, kásipkerlerden jaýap alýmen ǵana shektelýge múmkindigi bar. Biraq is júzinde kásipkerlerdiń salyq organdaryna jibergen habarlamalarynyń kópshiligi qabyldanbaı qalatyny belgili boldy. Bes kúnde shottar buǵattalǵan soń, bıznestiń barlyq qyzmeti toqtaıdy. Kásipker óziniń barlyq kelisimderiniń jaramdy ekenin dáleldese de, bul buǵattardy alyp tastaý bir aıdan alty aıǵa deıin sozylýy múmkin. Sondyqtan, aýdandyq deńgeıde kásipkerlerdi beınekameraǵa túsirip, kýáligin ózimen birge ustaýdy talap etken jaǵdaılar bolǵanyn Memlekettik kirister departamentiniń basshylyǵyna jetkizgim keledi. Sondaı jaǵdaıǵa tap bolǵan kásipkerdiń biri búgingi otyrysqa shaqyryldy, kásipkerdiń aıtýynsha bul – naǵyz qorlaý. Mine, osyndaı jaıttarǵa pılottyq jobada Memlekettik kirister departamenti tarapynan jol berilmeýi kerek. Eger pılottyq joba osylaı jalǵasa berse, ony sátsiz dep sanaýǵa barlyq negiz bar», - dedi Nur-Sultan qalasy kásipkerler palatasy dırektorynyń orynbasary Qýanyshbek Muqash.
Óz kezeginde elordalyq Memlekettik kirister departamenti basshysynyń orynbasary Táýken Oshaqbaev elordada 3 myńnan astam kompanııanyń shottary ne úshin buǵattalǵanyn túsindirdi.
«Pılottyq jobanyń basynda Nur-Sultan qalasy boıynsha 600 kompanııa tolyǵymen buǵattaldy. ıAǵnı, olar – «qolma-qol aqsha keńseleri» dep atalatyn kompanııalar. Nelikten mundaı pılottyq joba qolǵa alyndy, óıtkeni qazir bizde elektrondy shot-faktýrany tolyǵymen qamtamasyz etetin aqparattyq júıe bar, sondyqtan EShF engizilgen kezde syn-táýekeli kóp kompanııalardy avtomatty túrde súzip shyǵýǵa bolady. Bul pılot táýekeli kóp mámilelerdi anyqtaıdy», - dep túsindirdi T. Oshaqbaev Nur-Sultan qalasy Kásipkerler palatasynyń Kásipkerlerdiń quqyqtaryn qorǵaý jáne sybaılas jemqorlyqqa qarsy is-qımyl jónindegi keńesiniń otyrysynda.
Spıkerdiń aıtýynsha, sońǵy ýaqytta elordada 3 551 kompanııa buǵattalǵan, onyń 29% ózderiniń salyq mindettemelerin qaıta qarady jáne tıisinshe esepshottaryn qaıta ashqan.
