Beıbitsúıgishtik – bizdi biriktiretin faktor
PAVLODAR. KAZINFORM - Anatolıı Vasılevıchtiń «T. Shevchenko atyndaǵy ýkraın mádenıetiniń Pavlodar seriktestigi» oblystyq qoǵamdyq birlestiginiń tizginin ustaǵanyna bir jyldaı ǵana ýaqyt ótipti. Deıturǵanmen ol uıymnyń jumysyna 28 jyldan beri belsendi aralasyp, ortalyq horynda án salyp keldi. Assambleıanyń, óz birlestiginiń qyr-syryn bes saýsaǵyndaı jaqsy biletindikten jergilikti ýkraınder ony birden qoldap, saılaǵan.
«T. Shevchenko atyndaǵy ýkraın mádenıetiniń Pavlodar seriktestigi» oblystyq qoǵamdyq birlestigi - elimizdegi qoǵamdyq ınstıtýtty damytýǵa súbeli úles qosyp kele jatqan uıymnyń biri. Birlestik jetekshisi, qurmetti aqsaqal Anatolıı Neýmyvako men onyń áýleti úshin Qazaqstan qutty mekenge aınalǵan.
Áriptesteri ánshilik ónerin jaqsy baǵalaıdy. 1996 jyldan bastap qoǵamdyq birlestiktiń mádenı ómirine belsene aralasyp, túrli mádenı keshter, arnaıy festıvaldarǵa qatysady. Anatolıı Neýmyvako 150-ge jýyq ýkraın ánderin hormen de, jeke ózi de oryndaıdy. Hor músheleri ýkraın ánderinen bólek, Abaıdyń, basqa da qazaq kompozıtorlarynyń ánderin biledi eken.
- Bizde Ulttyq jańǵyrý mektebi bar, ondaǵy eki synypta balalarǵa ýkraın halqynyń tili úıretilip, mádenıeti tanystyrylady. Ekinshi jaǵynan ol jerde qolónermen, ulttyq buıymdardy ázirleýmen de aınalysýǵa múmkindik bar. Bizge «Qoǵamdyq kelisim» mekemesiniń qoldaýymen ádemi kıimder, kostıýmder tigilip, merekelik is-sharalarǵa úzbeı qatysamyz. Jastar ortalyǵy negizinen kontserttik baǵdarlamalarǵa jıi barady. Buǵan qosa analar keńesi, aqsaqaldar keńesi jumys istep tur. Ondaǵy múshelerimiz uzaq jyldan beri jergilikti Assambleıamen, «Dostyq úıimen» tyǵyz baılanysta. Mektepterge jıi shyǵyp, halqymyzdyń tarıhy, mádenıeti, turmys-tirshiligi, salt-dástúri, ádet-ǵurpy týraly jas urpaqqa dáris oqımyz. Osynyń barlyǵy elimizdegi halyqtar erkindiginiń, aýyzbirshilik pen yntymaǵymyzdyń qaımaǵy buzylmaýynyń aıǵaǵy, - dep áńgimeledi aqsaqal.
Anatolıı Vasılevıch búgingi Qazaqstannyń jastary jańashyl ári bilimqumar ekenine toqtaldy. Aıtýynsha, keńes dáýirindegi jastardyń qundylyǵy, ómir salttary múlde bólek edi. Jas azamattar ulttar men halyqtar arasyndaǵy dostyqtyń nyǵaıýy beıbitshilikke negiz bolatynyn jaqsy túsinedi. Sondyqtan osy qundylyqty joǵary baǵalaıtyndary baıqalatyndaı.
Birlestiktiń jastar qanaty aqsaqaldarǵa zor qolǵanat bolyp turǵan kórinedi. Túrli is-sharalardy birlesip atqaryp, qaıyrymdylyq sharalaryna eldiń aldy bolyp júgiredi. Jýyqta oblys ortalyǵyndaǵy «Samal» ońaltý ortalyǵyna baryp, ondaǵy emdelýshilerge syılyq jasaǵan. Buǵan qosa, Ýkraınadan qonys aýdaryp kelgen azamattarǵa, eldegi tabıǵı apattardan zardap shekkenderge kómek kórsetýde eresektermen birge tize qosyp júr. Jastardyń mundaı ıgi isterge jumylýyna Ulttyq jańǵyrý mektebiniń ustazy Tatıana Golovchýk, ata-ana Tatıana Saenko jáne taǵy basqa belsendi jandar sebepker.
A. Neýmyvakonyń negizgi mamandyǵy – orys tili pániniń muǵalimi. 48 jyl ustazdyq etip, mektep dırektory laýazymyn da abyroıly atqarǵan. Onyń atasy men ájesi sonaý XVIII ǵasyrdyń sońynda Qazaqstan jerine kóship kelip, qazirgi Ertis aýdany aýmaǵyna taban tiregen. Sol ýaqyttan beri áýlet músheleri Qazaq jerindegi Ult-azattyq kóterilisti, tóńkeristi, ashtyq alapaty men stalındik qýǵyn-súrgindi, Ekinshi dúnıejúzilik soǵys ýaqytyndaǵy qıyndyqtardy qazaqtarmen birge bastan ótkerdi. Aqsaqal jubaıy Valentına Nıkolaevna ekeýi eki ul, bir qyz tárbıelep ósirip, búginde nemereleriniń qyzyǵyna kenelip otyr. Ýkraınany tarıhı otany sanaǵanymen, urpaǵy Qazaqstandy mekendep qalýyn tileıtinin jetkizdi.
- Qazaq halqynyń meıirimi men jomarttyǵy, beıbitsúıgish qasıetiniń arqasynda elimizdegi birlik pen yntymaqqa syzat túspeıtini anyq. Al Assambleıa sııaqty qoǵamdyq ınstıtýt óziniń qajettiligin áldeqashan dáleldep qoıǵan. Eń bastysy, munda túrli ulttar mádenıetiniń toǵysy bar. Mundaı jerde halyqtardyń bir-birine degen súıispenshiligi men qurmeti arta túsedi. Máselen, bizdiń birlestik ózge ulttyq ortalyqtarymen únemi baılanystamyz. Túrli saltanatty is-sharalarda, merekelik kontsertterde birlesip óner kórsetemiz. Aldaǵy ýaqytta bul baǵyttaǵy jumystarymyz jalǵasa beredi, sebebi bul bizdi biriktiredi, - deıdi ol.
