Beıbit Juqaev alǵash ret ATP 250 týrnıriniń shırek fınalyna shyqty

ALMATY. KAZINFORM – Qazaqstandyq, álemniń 213-raketkasy Beıbit Juqaev Almaty ATP 250 týrnıriniń shırek fınalyna joldama aldy.

Ekinshi aınalymda 24 jastaǵy qazaqstandyq tennısshi álemniń 25-raketkasy, chehııalyq Tomash Mahachty joldan taıdyrdy.

Birinshi partııada Beıbit 3:1 esebimen alda turǵan kezde ózin jaısyz sezingen chehııalyq sportshy básekeni jalǵastyrýdan bas tartty. 

T.Mahach birinshi aınalymda taǵy bir qazaqstandyq Tımofeı Skatovty utqan edi.

Aqtaý tennıs mektebiniń túlegi jartylaı fınalǵa shyǵý úshin álemniń 26-ynshy, osy jarystyń 3-raketkasy, reseılik Karen Hachanov nemese reıtıngide 116-oryndaǵy fınlıandııalyq Otto Vırtanenniń bireýimen talasady.

Sporttyq jolynda alǵash ret osyndaı sanattaǵy dodanyń shırek fınalyna ótken Beıbit Juqaev qazirgi kezde ATP Live reıtıngisinde 180-orynǵa kóterilip tur.

Eske sala keteıik, budan buryn Aleksandr Shevchenkonyń Almaty týrnıriniń shırek fınalynda óner kórsetetinin jazǵan bolatynbyz.