Beıbit kúnniń batyrlary: Adamdy qutqarý úshin otqa da, sýǵa da túsken shyǵysqazaqstandyq qutqarýshylar jaıly
19 qazan – Qutqarýshy kúni. Bul jalaqy alý úshin ǵana baratyn mamandyq emes. Ózgege kómektesýdi jany qalap, eldiń rızashylyǵyna bólenýdi maqsat etken «júreginiń túgi bar» jandar ǵana bet buratyn, qyzyǵynan qateri basym sala.
Kásibı merekege oraı Kazinform agenttiginiń tilshisi oqyrmandy Shyǵys Qazaqstan oblysy Tótenshe jaǵdaılar departamentiniń sapynda jemisti jumys istep júrgen beıbit kúnniń batyrlarymen tanystyrmaq.
Órt qaıda, Ótemis sonda
Ótemis Raıymbekov Rıdder qalasyndaǵy № 1 mamandandyrylǵan órt sóndirý bóliminiń bastyǵy. Osy salada ter tógip júrgenine 10 jyldan asqan ol 120-dan astam apattyq-qutqarý jumystaryna jetekshilik etken.
- Bul meniń jumysym emes, súıikti isimdeı. Esh ýaqytta qıyndyqtardan qoryqpaımyn, kez kelgen jaǵdaıda salqynqandylyq tanytýǵa tyrysamyn. Árbir oqys oqıǵaǵa barý arqyly jańa tájirıbe jınap, shyńdala túsesiń. Jumys barysynda túrli jaǵdaılar boldy ǵoı. Sonyń arasynan eske alar bolsaq, 2022 jyldyń mamyr aıynda «Belyı Lýg» saıajaı qoǵamdastyǵyndaǵy jer úıdiń aýlasynan órt shyqqan edi. Ot birden butalarǵa jaıylyp, qatty jeldiń áserinen 10 gektar aýmaqty sharpydy. Eldi mekenge jáne 30 metr qashyqtyqtaǵy orman alqabyna órt qaýpi tóndi, - deıdi ol.
Sol kezde Ótemis Raıymbekov jergilikti atqarýshy organdarmen jedel is-qımyl josparyn oılastyrdy. Órtti sóndirýge orman sharýashylyǵy kásiporyndarynan 30 adam men jer jyrtatyn tehnıkalar dereý jumyldyryldy. Keıipkerimizdiń basshylyǵymen jáne órt sóndirýshilerdiń, ormanshylardyń, jergilikti atqarýshy organdardyń birlesken kúsh-jigeriniń arqasynda tilsiz jaý tolyqtaı aýyzdyqtaldy.
«Birde Aıdarhanov kóshesinde bes qabatty úıden órt shyqqan bolatyn. Áriptes jigittermen birlesip sol úıden eki turǵyndy aman alyp shyqtyq. Aıta berseń osyndaı oqıǵa kóp», - deıdi Ótemis.
Birneshe jyldyń ishinde Ótemis Raıymbekovten 30-dan astam órt sóndirýshi tálim-tárbıe alyp, onyń mektebinen ótti. Ol №1 mamandandyrylǵan órt sóndirý bólimshesiniń bastyǵy qyzmetine taǵaıyndalǵan 2 jylda órtten barlyǵy 15 adam qutqarylǵan.
Osy jyly tájirıbeli maman «Tótenshe jaǵdaılardyń aldyn alý jáne joıýdaǵy úzdik eńbegi úshin» medalimen marapattaldy.
Jumysqa júrek qalaýymen kelgen
Denıs Klassen azamattyq qorǵaý organdarynda 2003 jyldan beri qyzmet etýde. Bala kezinen adamdarǵa, qoǵamǵa paıdasyn tıgizgisi kelipti. QR Qarýly Kúshterinde qyzmet etken Denıs órt sóndirýshi bolyp jumysqa ornalasqan. Jalynmen kúrestegi alǵashqy tájirıbesi týraly ol bylaı dep eske aldy:
«Birinshi ret kezekshilikte otyrmyn. Kenet shaqyrtý túsip, Altaı aýdanyndaǵy Pýtıntsevo aýylyna jol tarttyq. Turǵyn úı men sharýashylyq qora-jaıǵa jaıylǵan órttiń jalpy aýdany 300 sharshy metrden asqan. Osy alǵashqy saparymnan-aq ómirdegi óz ornymdy tapqanymdy túsindim. Qorqynysh, tolqý sezimderi múlde bolǵan joq. Oıymda tek bir nárse - órt sóndirý jetekshisiniń tapsyrmalaryn oryndaý, alǵashqy daıyndyq mektebinde alǵan bilimimdi kádege jaratý».
20 jyldyq qyzmet barysynda Denıs Klassen aǵa órt sóndirýshi, bólimshe komandıri boldy. Al 2017 jyldan bastap gaz-tútinnen qorǵaý qyzmetiniń aǵa sheberi qyzmetin atqarýda. Osy ýaqyt ishinde qansha órtti sóndirgenin, neshe adamdy qutqarǵanyn da bilmeıdi.
- Sebebi men qutqarylǵan adamdardy múlde sanamadym. Meniń oıymsha, qutqarýshyǵa jaqsy jarasatyn qasıet – qarapaıymdylyq. Biz adamdardyń qaýipsizdigi, memlekettiń ıgiligi úshin jumys isteımiz, ózgege kómektesý – kásibı boryshymyz, - deıdi qutqarýshy.
2020 jylǵy 27 aqpanda Altaı qalasynyń №3 mamandandyrylǵan órt sóndirý bóliminiń dıspetcherine kóppáterli ekiqabatty úıdi tútin basqany týraly habar túsken. Belgili bolǵandaı, órt birinshi qabattaǵy páterde shyǵypty. Keıipkerimiz ishke kirip, kórshi páterde tútinnen qatty ulanyp, talyp qalǵan qart áıeldi tapqan. Qutqarýshy tynys alý apparatyna jalǵanǵan panoramalyq maskany sheship, ony zardap shekken adamǵa kıgizdi.
- Tútinnen qorǵaıtyn maskany sheshýimniń óz densaýlyǵyma qaýip tóndiretinin jaqsy túsinip turdym. Biraq bireýdiń ómiri úshin jaýapkershilik áldeqaıda kúshtirek bolady. Sondaı-aq úıde ekinshi qabattaǵy Uly Otan soǵysynyń ardagerine kómek qajet edi, biraq densaýlyǵyna baılanysty atany tasymaldaý múmkin bolmaı turdy, - dep eske aldy Denıs Klassen.
Órt sóndirýshiler terezelerdi ashyp, qartty taza aýaǵa shyǵaryp, tynys alý apparatyn alyp kelgen. Sóıtip, abyroı bolǵanda oqys oqıǵadan adam shyǵyny bolǵan joq.
Qyzmetten bos ýaqytynda keıipkerimiz qutqarýshynyń kıimin aspazshy formasyna aýystyrady. Otbasy úshin Shyǵys taǵamdaryn, palaý, laǵman daıyndaǵandy jany súıedi.
Jasulan jylqylardy jaqsy kóredi
Katonqaraǵaı aýdanyndaǵy №27 órt sóndirý bóliminiń qaraýyl bastyǵy Jasulan Qabdoshevtiń erekshe hobbıi bar. Otpen kúresýden jáne adam janyn ajaldan arashalaýdan bos ýaqytynda ol nıet bildirýshilerge atqa minýdi úıretedi.
Jasulan ekinshi synypta týǵan aýylynda at jarysyna qatysqan. Sodan beri atqa minýdiń qyr-syryn meńgerip, onyń densaýlyqqa degen mol paıdasyna qanyqty.
«At sportynda naǵyz kásipqoı maman bolǵym keledi. Mektep kezinde ár demalysty týǵan aýylym Katonqaraǵaıdyń ıppodromynda ótkizetinmin», - deıdi Jasulan Qabdoshev.
Keıipkerimiz 8 jyldan astam ýaqyt boıy atqa mingisi kelgenderge tálim berip, jol nusqap keledi. Mersedes, Aqbataı, Aıarý jáne Patsha - eń súıikti jylqylary. Onyń júırikteri birneshe ret báıgelerde júldeli oryndarǵa ıe boldy.
- Mektepti bitirgennen keıin S.Amanjolov atyndaǵy ShQÝ-ǵa oqýǵa tústim. «Alǵashqy áskerı daıyndyq» mamandyǵy boıynsha dıplom alyp, órt sóndirý bólimine jumysqa ornalastym. 15 jyldyq qyzmet barysynda talaı oqys oqıǵalarǵa bardyq. Onyń ishinde iri órtterdi de sóndirdik. Eń úlkenderdiń biri - Rahman qaınary aımaǵyndaǵy tabıǵı orman órti. Jetýi qıyn taýly aımaqta tilsiz jaýmen kúreske túsý ońaıǵa soqpady. Áıteýir áriptesterimizben jumyla áreket etip, otty tolyqtaı aýyzdyqtadyq, - deıdi Jasulan.
P/s: Dárigerlerdi tek aýyrǵanda, qutqarýshylardy tek qıyn jaǵdaıǵa tap bolǵanda eske almaı, olardy qadirleı bileıik. Sońǵy jyldary elimizdiń túkpir-túkpirinde shyǵyp jatqan iri órtter tótenshe jaǵdaılar salasynda ter tógip júrgen jandardyń eńbeginiń mańyzdylyǵyn aıshyqtap berdi. Kásibı merekelerińiz qutty bolsyn, beıbit kúnniń batyrlary!