«Beıbitshilik pen túsinistik jolyndaǵy dinaralyq dıalog» atty dóńgelek ústel ótti
Bul is-shara Konfessııaaralyq jáne órkenıetaralyq dıalogty damytý jónindegi N.Nazarbaev ortalyǵynyń qoldaýymen, Qazaqstannyń Irandaǵy elshiliginiń uıymdastyrýymen, IIR Mádenıet jáne ıslam baılanystary uıymy jáne Irannyń Qazaqstandaǵy elshiliginiń belsendi qatysýymen ótkizildi.
Dóńgelek ústelge QR Aqparat jáne qoǵamdyq damý vıtse-mınıstri S.Egizbaev, IIR Mádenıet jáne ıslam baılanystary uıymynyń Dinaralyq jáne mádenıetaralyq dıalog ortalyǵynyń tóraǵasy Ǵ.Súleımanı, Qazaqstannyń Irandaǵy Elshisi A.Orazbaı, Irannyń Qazaqstandaǵy elshisi M.Saber, Qazaqstan musylmandary dinı basqarmasynyń naıb mýftıi E.Ońǵarov, Qum qalasyndaǵy Halyqaralyq dinderdi zertteý uıymy basshysynyń orynbasary H.Ábdıpýr, «Rýhanı jańǵyrý» qazaqstandyq qoǵamdyq damý ınstıtýty» KEAQ jetekshisi Q.Maıgeldınov, Konfessııaaralyq jáne órkenıetaralyq dıalogty damytý jónindegi N.Nazarbaev ortalyǵynyń Dinı ahýaldy taldaý eáne dintaný saraptamasy ınstıtýtynyń basshysy E.Baıbol, IIR Mádenıet jáne ıslam baılanystary uıymynyń Dinaralyq jáne mádenıetaralyq dıalog ortalyǵynyń Islam, ortodoksaldy hrıstıan jáne protestant dinderi jónindegi depatramentiniń basshysy Z.Rashıdbeıgı jáne eki eldiń ózge de sarapshylary qatysyp, sóz sóıledi.
Osy is-sharaǵa IRNA, Tehran times, Iran news, Iran daily, Asia, Iran jáne ózge de BAQ ókilderi qatysyp otyrdy.
QR Aqparat jáne qoǵamdyq damý vıtse-mınıstri S.Egizbaev dóńgelek ústeldi resmı túrde ashyp, Qazaqstan óz táýelsizdiginiń 30 jyly ishinde qol jetkizgen jetistikterine, sonyń ishinde dinaralyq dıalogtyń mańyzdylyǵyna toqtaldy.
Konfessııaaralyq jáne órkenıetaralyq dıalogty damytý jónindegi N.Nazarbaev ortalyǵynyń ınstıtýt basshysy E.Baıbol Qazaqstannyń halyqaralyq arenada kótergen bastamalarynyń pármendi túrde júzege asqanyn, sonyń ishinde Álemdik jáne dástúrli dinder seziniń jahanda konfessııaaralyq dıalog ornatýdaǵy mańyzyn, QR Prezıdenti Q.K.Toqaevtyń keıingi saıası-ekonomıkalyq reformalaryn, QR qoǵamy kelisim men úılesimdilikte damyp otyrǵanyn ashyp kórsetti.
Sonymen qatar, IIR Mádenıet jáne ıslam baılanystary uıymynyń Dinaralyq jáne mádenıetaralyq dıalog ortalyǵynyń tóraǵasy Ǵ.Súleımanı tarıhtaǵy dinaralyq dıalogtyń róline, Quran Kárimdegi osy jónindegi aıattyń mán-mańyzyna aıryqsha nazar aýdardy.
Qazaqstannyń Irandaǵy elshisi A.Orazbaı QR Tuńǵysh Prezıdenti – Elbasy N.Á.Nazarbaevtyń basshylyǵymen dinaralyq jáne etnosaralyq dıalogqa qol jetkizý jolynda qazaqstandyq biregeı model qalyptasqanyna, halyqaralyq arenada Álemdik jáne dástúrli dinder lıderleriniń sezi sııaqty mańyzdy halyqaralyq is-sharalar ótkizilip kele jatqanyna egjeı-tegjeıli toqtaldy. Qazaq elshisi QR Prezıdenti Q.K.Toqaev saıası sabaqtastyqty úzbeı, dinaralyq jáne etnosaralyq kelisim men túsinistiktiń saqtalýyna, Din seziniń otyrystaryn jańa mazmunda jalǵastyrýǵa mán berip otyrǵanyn atap kórsetti.
Budan ózge, Irannyń Qazaqstandaǵy elshisi M.Saber óziniń beıbitshilikti súıetin, dıalog pen toleranttylyqty jaqtaýshy retinde tanymal elde mıssııada júrgenine asa qýanyshty ekenin málimdedi. Ol QR Tuńǵysh Prezıdenti N.Á.Nazarbaevtyń «Álemdik jáne dástúrli din kóshbasshylarynyń sezin» shaqyrý, «Qazaqstan halqy assambleıasyn» qurý týraly bastamalary Qazaqstannyń ártúrli dinder arasyndaǵy beıbitshilikti, dıalogty jáne aýyzbirshilikti ilgeriletýge umtylysynyń aıqyn kórinisi ekenin qadap aıtty.
Al, Qazaqstan musylmandary dinı basqarmasynyń naıb mýftıi E.Ońǵarov konfessııaaralyq dıalogtyń dinı aspektilerine, búginde Qazaqstan jahandyq konfessııaaralyq únqatysý ortalyǵy bolyp sanalatynyna toqtaldy.
Budan bólek, IIR Dinaralyq jáne mádenıetaralyq dıalog ortalyǵynyń depatrament basshysy Z.Rashıdbeıgı konfessııalar dıalogyn qalyptastyrýdaǵy Álemdik jáne dástúrli din kóshbasshylary seziniń mańyzdy róline mán berdi.
Jalpy, atalǵan jáne ózge de spıkerler beıbitshilik pen túsinistik jolyndaǵy dinaralyq dıalogty ilgeriletýdiń mańyzyn, Qazaqstan men Irannyń osy maqsattaǵy kúsh-jigerlerin, Dinaralyq dıalogtyń biregeı alańy - Álemdik jáne dástúrli din kóshbasshylarynyń sezinde kóterilip júrgen bastamalar pen oı-pikirlerdiń ózektiligin, QR Prezıdenti Q.K.Toqaevtyń Qazaqstan halqyna joldaýlaryndaǵy mindetterdiń sátti iske asyrylý barysyn keńinen talqylady. Sondaı-aq, olar QR basshylyǵynyń halyqaralyq bastamalaryna joǵary baǵa berip, dinaralyq dıalogtyń aýqymy kúnnen-kúnge keńeıip, túpki maqsatyna kún saıyn jaqyndaı túsetinine úmit bildirdi.
