Beıbit Atamqulov ǵaryshqa ushyrylǵan jer serikteri týraly aıtyp berdi
QR Qorǵanys jáne aeroǵarysh ónerkásibi mınıstri Beıbit Atamqulovtyń aıtýynsha, túngi saǵatta 00:32-de AQSh-tyń Kalıfornııa shtatynda "Falcon SpaceX" zymyrantasyǵyshy sátti ushyryldy. Onda eki qazaqstandyq jer serigi boldy. "Biz búgin tańerteń eshteńe xabarlaǵan joqpyz. Sebebi bizdiń jer serikterimiz orbıtaǵa shyǵýy tıis edi. Qazirgi kezde olar orbıtaǵa sátti shyǵyp, jumys isteı bastady. Osy ýaqytqa deıin biz tórt sıgnaldy qabyldadyq. Astana men Almatydaǵy stansalarǵa sıgnaldar tústi. Budan bólek, brıtandyq áriptesterimiz de barlyq sıgnaldardy kórdi. Bir sózben aıtqanda, ǵaryshqa ushyrylǵan jer serikterimiz shtattyq rejımde jumys istep jatyr", - dedi B.Atamqulov Úkimet otyrysynan keıin jýrnalısterge bergen suxbatynda.
Mınıstrdiń sózine qaraǵanda, qazirgi kezde jer serikterin retke keltirý sharalary atqarylyp jatyr. Jospar boıynsha eki aptadan keıin tıisti málimetter túse bastaıdy.
"Máselen, ekinshi jer serigimizde jerdi qashyqtan túsirý apparatýrasy bar. Odan alǵashqy sýretter túsetin bolady. Aıta keter jaıt, bir jer serigin tolyǵymen otandyq ınjenerler jınap shyqty. Ekinshisi brıtandyq áriptesterimizben birlesip shyǵaryldy. Sondyqtan osy jer serikteri arqyly biz otandyq ónimdi synaqtan ótkizetin bolamyz. Bolashaqta jerdi qashyqtan túsirý serigin barynsha ózimiz jınaımyz degen jospar bar", - dep atap kórsetti B.Atamqulov.
