Betpaqdalada «Tulpar-Talgo» vagondary synaqtan ótedi
Osy maqsatta Kedendik odaqtyń «Temir jol jyljymaly quramynyń qaýipsizdigi týraly» tehnıkalyq reglamenti talaptaryna sáıkes vagonnyń 8 túrin sertıfıkatsııalaý týraly kelisimshart jasaldy, synaq ortalyǵy retinde Qazaqstandyq temir jol kóligin sertıfıkatsııalaý ortalyǵy bekitildi. 
Erterekte Germanııanyń Leıptsıg qalasyndaǵy IFFEngineering&Consulting ortalyǵynda vagon kýzovtarynyń beriktigi synalǵan edi. Synaq nátıjeleri oń bolyp, temir jol kóligi qaýipsizdigi salasyndaǵy barlyq normatıvterge sáıkes ekeni anyqtaldy.
Maýsym aıynda Vena qalasyndaǵy (Aýstrııa) RTARailTecArsenal ortalyǵynda vagondardyń jylytý, jeldetý jáne kondıtsııalaý júıeleri parametrleriniń sáıkestigine synaq júrgizildi. Onyń da qorytyndysy kóńilge qonarlyq.
Shilde aıynda dınamıkalyq synaqtarǵa 29 vagonnan turatyn 2 quram jiberildi. Ázirge quramdardyń biriniń tejegish júıesine bastapqy synaqtar júrgizildi. Ekinshi quramnyń kishi jáne orta radıýstaǵy dınamıkalyq sıpattamalary tekserildi. Eki quram boıynsha da aldyn ala oń baǵam jasalǵan.
Dınamıkalyq synaqtar áli de jalǵasyp jatyr jáne bıylǵy qazan aıynda aıaqtalady. Odan keıin synaqtardyń ótkeni týraly hattamalar toltyrylyp, sertıfıkattaý organdaryna beriledi. Sáıkestendirý sertıfıkattary 2016 jyldyń 1 jeltoqsanynda beriledi dep kútilýde.
Jańa vagondardyń ereksheligi nede? Vagondardyń barlyq túrinde ınterer dızaıny ózgerdi. Otyrýǵa arnalǵan oryndary bar «Týrıst» vagondarynyń jańa túrleri paıda boldy. Bıznes-klass vagondarynyń ár kýpesinde jýǵysh pen kishkene ústel bar. Grand-klass vagondarynda barlyq qajetti dúnıeler qamtylǵan.
Múgedekterge arnalǵan kýpe jyljymaly esiktermen jáne kireberis esik jaqtan jınamaly kótergishpen jabdyqtalǵan.
Jalpy alǵanda, jańa modıfıkatsııalanǵan barlyq «Tulpar-Talgo» vagondarynyń eni 25 sm-ge jáne bıiktigi 22,4 santımetrge uzardy. Sanıtarlyq toraptar 1,8 esege ulǵaıdy. Jatyn sóreleri de keńeıtildi. Korıdor eni 10 santımetrge uzardy. 2016 jyly 149 jańa modıfıkatsııalanǵan, kýzovtary keń otandyq «Tulpar-Talgo» vagondaryn jetkizý josparlanǵan.
Qazirgi ýaqytta respýblıkanyń barlyq oblys ortalyqtaryn baılanystyratyn 12 júrdek baǵyt bar, 2020 jylǵa qaraı «Tulpar-Talgo» poıyzdarynyń 8 jolaýshylar baǵyty jańarady.
Bıyl «Astana-Almaty» jáne «Almaty-Shymkent» baǵyttary boıynsha jańa poıyzdar jiberiledi, osylaısha «Tulpar-Talgo» poıyzdary atalǵan baǵytta kúnine 2 ret qatynaıtyn bolady. 
