Bes jyl ishinde muǵalimderdiń aılyǵy eki esege kóterildi - mınıstr
ASTANA. KAZINFORM - QR Oqý-aǵartý mınıstri Ǵanı Beısembaev qazaqstandyq ustazdardy kásibı merekesimen quttyqtady.
Ol ustazdyń mamandyq ıesi ǵana emes, ol óskeleń urpaqtyń rýhanı baǵbany, bolashaqtyń negizin qalaýshy ult kelbeti ekenin aıtty. Qazaq halqy qaı ýaqytta bolmasyn, ustazdy qurmetpen tórge ozdyrǵan.
«Ustaz — ulyq emes, uly qyzmet» dep batyr Baýyrjan Momyshuly baǵalaǵandaı, memlekettiń erteńgi taǵdyryna jaýapty urpaqty tárbıeleýde ustazdarǵa artylǵan amanattyń júgi salmaqty. Sebebi, árbir shákirttiń júregine bilimniń shamshyraǵyn jaǵatyn — Ustaz.
Búginde oqý-aǵartý júıesinde 600 myńǵa jýyq pedagog eńbek etýde. Memleket basshysynyń qoldaýynyń arqasynda pedagog mamandyǵynyń bedelin arttyrý boıynsha orasan zor sharalar júzege asyryldy. Onyń alǵashqysy da, mańyzdysy — muǵalim qaýymy kópten kútken «Pedagog mártebesi» týraly zańnyń qabyldanǵanyna da bıyl 5 jyl. Osy ýaqyt aralyǵynda muǵalimderdiń aılyǵy eki esege kóterildi, olar qaǵazbastylyqtan, artyq júktemeden, óz mindetine jatpaıtyn jumystan bosatyldy, jańa yntalandyrýlar belgilenip, múmkindikterge jol ashyldy. Balabaqsha tárbıeshileri men kolledjderge óndiristen tartylǵan oqytýshylardyń jalaqysy artýda. Bilim berý uıymdarynyń ınfraqurylymynyń, materıaldyq-tehnıkalyq bazasynyń joǵarǵy talaptarǵa sáıkes jaqsarýy men jabdyqtalýyna baǵyttalǵan «Jaıly mektep» ulttyq jobasy memleket tarapynan bilim salasyna sońǵy jyldarda kórsetilgen qamqorlyqtyń aıqyn mysaly bola alady. Bul baǵyttaǵy jumys áli de kúsheıtilip, jalǵasýda.
Uly aǵartýshy Ybyraı Altynsarın «Muǵalim — mekteptiń júregi» dep beker aıtpaǵan. Mekteptiń, balanyń bolashaǵy sizderdiń qoldaryńyzda, qurmetti Ustazdar!», — dedi mınıstr.
Onyń paıymynsha, ustazdardyń eńbekteri — elimizdiń jarqyn ári baqytty bolashaǵynyń negizi. Olar halqymyzdyń dástúrleri men qundylyqtaryna qurmetpen qarap, qadirleıtin sanaly urpaq qalyptastyrýǵa bar jan-tánin salady.
«Sebebi, biz árisi — Ál-Farabı, Abaı, Y.Altynsarın, A.Baıtursynuly, M.Jumabaev, J.Aımaýytov sekildi kórnekti oıshyldardyń, berisi — K.Nurǵalıev, K.Aıtqalıev, K.Bitibaeva, R.Nurtazına, M.Tasova sekildi eldiń qurmetine bólengen qaıratkerlerdiń, Aıagúl Mırazova, Alına Soloveva, Alma Shúkijanova ispetti Eńbek erleriniń jolyn laıyqty jalǵastyrýymyz kerek.
Qurmetti ustazdar! Qurmetti áriptester! Sizderdi tól merekemizben quttyqtaımyn! Sizderdiń qajyrly eńbekterińiz ben óz isterińizge degen adaldyqtaryńyz úshin shynaıy alǵysymdy bildiremin. Sizderdiń arqalaryńyzda oqýshylarymyz túrli halyqaralyq bilim dodalarynda kók baıraǵymyzdy jeńis tuǵyrynan jelbiretip keledi. Elimizdiń óskeleń urpaǵynyń zııatkerlik áleýetine kúlli álem joǵary baǵa berdi. Tek osy jyldyń ózinde bizdiń oqýshylarymyz 58 altyn medal jeńip alyp, robototehnıkadan álemniń úsh dúrkin, hımııadan eki dúrkin chempıony atandy. Sizderdiń denderińizge saýlyq, sarqylmas qýat, qyzmette tabysty bolyp, abyroı bıiginen kórinýlerińizdi tileımin!», — delingen Ǵanı Beısembaevtyń jazbasynda.
