Bes óńirde kóshet ósiretin 6 tálimbaq salynady
ASTANA. KAZINFORM - 2026 jyldyń basynda elimizdiń bes óńirinde kóshet ósiretin 6 tálimbaq salynady. Bul týraly jyl qorytyndysyna oraı BAQ ókilderine arnalǵan brıfıngte Ekologııa jáne tabıǵı resýrstar mınıstri Erlan Nysanbaev aıtty.
- Memleket basshysynyń eldi mekenderde 15 mln aǵash egý jónindegi tapsyrmasy tolyq kólemde oryndaldy. Biz aldaǵy ýaqytta da oblys ákimdikterimen birlesip, jumysty jalǵastyramyz. Bul rette aýdan ortalyqtary men aýyldyq eldi mekenderdi kógaldandyrýǵa basymdyq berip, iri eldi mekenderdiń aınalasynda jasyl beldeýler qurý jumystaryn qolǵa alatyn bolamyz, - dedi ol.
Erlan Nysanbaevtyń aıtýynsha, Memleket basshysynyń 2 mlrd kóshet egý jónindegi tapsyrmasyn iske asyrý jalǵasyp jatyr. Jalpy 2021–2025 jyldary aralyǵynda 1,5 mlrd kóshet egildi. Kelesi jyly 208 mln-nan astam kóshet egý josparlanyp otyr.
- Oblys ákimdikteri qoldanystaǵy tálimbaqtardy rekonstrýktsııalaý jáne jańa pıtomnıkter salý boıynsha sharalar qabyldaýda. Sonymen qatar, 2026 jyldyń basynda elimizdiń bes óńirinde jylyna árqaısysy 6 mln tamyr júıesi jabyq kóshet ósiretin 6 tálimbaq salý josparlanýda, - dedi mınıstr.
Aıta keteıik, Almatyda iri orman tálimbaǵy salynady.