Berlınde «Jasyl Ortalyq Azııa» qorshaǵan ortany qorǵaý jobasy bastaldy

NUR-SULTAN. QazAqparat – Qazaqstan Respýblıkasynyń Syrtqy ister mınıstri Muhtar Tileýberdi Eýroodaqtyń Ortalyq Azııa men Aýǵanstan úshin jańa strategııasyn iske asyrý sheńberinde Germanııa bastamashylyq etken klımatty qorǵaý máseleleri jónindegi «Jasyl Ortalyq Azııa» aımaqtyq ıntegratsııalyq jobasyn iske qosý jónindegi joǵary deńgeıdegi konferentsııaǵa qatysty.

Bul týraly QR SІM baspasóz qyzmeti habarlady.

Іs-sharaǵa, sondaı-aq, EO-nyń Syrtqy ister jáne qaýipsizdik máseleleri jónindegi Joǵarǵy ókili Jozep Borrell, Túrikmenstan Vıtse-premeri - Syrtqy ister mınıstri Rashıd Meredov, Qyrǵyzstan Syrtqy ister mınıstri Chıngız Aıdarbekov, Ózbekstan Syrtqy ister mınıstri Abdýlazız Kamılov, Tájikstan Syrtqy ister mınıstri Sırodjıddın Mýhrıddın, Aýǵanstan Syrtqy ister mınıstriniń orynbasary Mırvaıs Nab, sondaı-aq halyqaralyq uıymdar men ǵylymı-zertteý ınstıtýttarynyń ókilderi qatysty.

Konferentsııany asha otyryp, GFR Syrtqy ister mınıstri Haıko Maas Germanııa úkimetiniń jańa jobasy kúsheıtilgen transshekaralyq yntymaqtastyq arqyly sý resýrstaryn basqarýǵa kómek kórsetý boıynsha kópjyldyq «Ortalyq Azııa úshin sý bastamasynyń» («Berlındik protsess» dep atalatyn) jalǵasy bolyp tabylatynyn atap ótti. Osylaısha, «Jasyl Ortalyq Azııa» klımattyń ózgerýi máseleleri boıynsha alty memlekettiń qaýipsizdigi men turaqtylyǵy kontekstinde joǵary deńgeıdegi dıalogty qoldaýǵa baǵyttalǵan.

Mınıstr M. Tileýberdi óz sózinde nemis tarapyna usynǵan bastamashylyǵy úshin alǵysyn bildirip, onyń Ortalyq Azııa aımaǵy úshin mańyzdylyǵy men ózektiligin atap ótti. Syrtqy saıasat vedomstvosynyń basshysy jasyl ekonomıkany damytý salasyndaǵy memlekettik saıasat, sondaı-aq Nur-Sultan qalasyndaǵy Halyqaralyq jasyl tehnologııalar ortalyǵynyń qyzmeti týraly habardar etti.

«Qazaqstan Úkimeti aldynda «jasyl ekonomıkany» damytý boıynsha uqsas mindet turǵanyn eskere otyryp, bizge osy baǵyttaǵy nemis tájirıbesi qyzyǵýshylyq týdyrady. Bizdiń elimizdiń halyqaralyq deńgeıde usynǵan bastamalary Qazaqstannyń ekonomıkany ekologııalandyrý, tabıǵı resýrstardy utymdy paıdalaný jáne qorshaǵan ortaǵa áserdi barynsha azaıtýǵa beıildiligin kýálandyrady», - dedi Qazaqstan SІM basshysy.

Sonymen qatar, Ortalyq Azııa elderiniń ókilderi aımaqtyń Germanııamen jáne EO qurylymdarymen ekologııa, qorshaǵan ortany qorǵaý, jasyl ekonomıka elementterin engizý jáne klımattyń jylynýyna qarsy kúres máselelerinde yntymaqtastyǵynyń mańyzdylyǵyn atap ótti.

Konferentsııa qorytyndysy boıynsha resmı delegatsııalardyń basshylary naqty jobalardy iske qosýǵa jaqsy negiz bolatyn Birlesken deklaratsııaǵa qol qoıdy.