Berik Ýálı Abaı oblysynyń turǵyndaryna úndeý joldady

ASTANA. KAZINFORM – Abaı oblysynda jyl boıy jalǵasatyn jalpyóńirlik senbilik bastalmaq. Osyǵan oraı óńir basshysy Berik Ýálı oblys turǵyndaryna úndeý jasady.

- Abaı oblysy uly tulǵanyń atymen atalǵan, alash arystarynyń izi qalǵan tarıhy tereń, tabıǵaty kórkem óńir. Bul – bizdiń ortaq úıimiz. Ony taza, jaıly, kórikti etip ustaý – árqaısymyzdyń azamattyq boryshymyz. Shyn máninde, bizdiń aımaq toǵyz joldyń torabynda tur. Ertistiń eki jaǵasyn jalǵaǵan jalǵyz kópirden eki alyp kórshimizge qaraı kólik aǵyny ótedi. Bul turǵydan alǵanda Semeıimiz aımaqtyq kólik-logıstıkalyq habqa aınalyp keledi. Bul bizge úlken múmkindik bergenimen, zor jaýapkershilik te júkteıdi. Shaharymyzdyń tazalyǵy men aımaǵymyzdyń abyroıy synalatyn da osy tus. Aımaq ekonomıkasy, óneri men mádenıeti, ekologııasy men tazalyǵy – barshamyzǵa ortaq. Al tazalyq degenimiz – jylyna bir ret senbilikke qatysý emes, bul – bizdiń óńirde qalyptasýy tıis úlken mádenıet, - dedi oblys basshysy.

Osy oraıda Berik Ýálı Memleket basshysy Qasym-Jomart Kemeluly Toqaev bul jóninde «Qalalar men aýyldardyń sáýletti, saıabaqtar men aýlanyń taza bolýy, eń aldymen, basqaǵa emes, ózimizge kerek», – dep atap ótkenin eske saldy.

- Týǵan jerimizdiń túlegeni, turǵan ortamyzdyń kirshiksiz bolǵany, eń aldymen, ózimizge kerek. Oblysymyzdyń tazalyǵy – ákimdik pen kommýnaldyq qyzmettiń ǵana emes, árbir azamattyń, árbir otbasynyń jaýapkershiligi. Bir-birimizge janashyrlyqpen, qorshaǵan ortaǵa qamqorlyqpen qaramasaq, kúndelikti júretin kóshelerimizdi, balalarymyz oınaıtyn aýlalarymyzdy syrttan kelip eshkim tazalap bermeıdi. Osy maqsatta Prezıdentimizdiń bastamasymen qolǵa alynǵan «Taza Qazaqstan» baǵdarlamasy aıasynda biz oblysymyzda jalpyóńirlik senbilikti bastaǵaly turmyz. Biraq bul bir rettik aktsııa emes, jyl boıy jalǵasatyn jaqsy dástúrge aınalýy tıis, - dedi ol.

Berik Ýálı bastamanyń baıandy bolýyna septigi tıer degen nıetpen arnaıy baıqaý jarııalanyp, «úzdik aýdan», «úzdik aýyl», «úzdik aýla», «úzdik ýnıversıtet», «úzdik kolledj», «úzdik mektep», «úzdik balabaqsha», «úzdik kóshe», «úzdik mekeme» nomınatsııalary boıynsha shynaıy janashyr jandar anyqtalatyndyǵyn aıtty. Jeńimpazdarǵa qomaqty syılyqtar da taǵaıyndalmaq.

- Týǵan jerimizdiń tazalyǵy úshin jumylý árqaısymyzdyń perzenttik paryzymyz! Men osy rette bıznes ókilderin, irgeli oqý oryndaryn, patrıot jastar men eriktilerdi, birligi jarasqan kásiporyndar men uıymdardy osy ıgi iske belsendi atsalysýǵa shaqyramyn. Bıyl aımaǵymyz atyn ıelengen uly Abaıdyń 180 jyldyǵy! Prezıdentimiz aıtqandaı, bul mereıtoıdy laıyqty deńgeıde atap ótýimiz kerek. Biz bir qoldyń salasyndaı, bir úıdiń balasyndaı birigip, bul sharany jaqsy atqarýǵa tıispiz. Birlik tanytatyn tustyń biri – osy sát, aǵaıyn. Sebebi biz elimizdiń túkpir-túkpirinen keletin qonaqtarǵa kórkem de, taza qalamyzdy uıalmaı kórsete alýymyz kerek. Oblys ortalyǵy retinde ekinshi tynysy endi ashyla bastaǵan qalamyz eshbir shahardan kem emes. Biz elimizdiń megapolısteri Astana, Almaty, Shymkent sııaqty iri qalalarynan úlgi alýymyz kerek, - dedi oblys ákimi.

Onyń atap ótýinshe, tazalyq aktsııalaryna erekshe mán beretin shet memleketter de az emes. Terrıtorııasy Abaı oblysynan birneshe ese kishi Estonııada bastalǵan osyndaı aktsııa «Álemdik tazalyq kúnine» aınalǵan. Al tazalyq mádenıeti qalyptasqan Japonııada «Tazalyq kúnderi» is-sharasy jıi ótkiziledi.

- Qoǵamdyq orynnyń tazalyǵy — ár adamnyń mádenıeti men ultqa degen qurmetiniń aınasy. Tazalyqty saqtaý — tek tártip emes, bul — ishki qundylyǵymyz. Dinimizde «Tazalyq — ımannyń jartysy» delinse, dana halqymyz «Tazalyq – saýlyq negizi, saýlyq – baılyq negizi» dep beker aıtpaǵan. Bul — halqymyzdyń ómirlik fılosofııasy men búgingi talapqa saı ustanymynyń úndesýi. Oblys ákimdigi tazalyqqa baılanysty mindetterin oryndaı beredi. Qordalanǵan máseleler ret-retimen, kezeń-kezeńimen sheshiledi. Bıyldyń ózinde oblysta 400 shaqyrym jol jóndelip, «Aýyl – El besigi» baǵdarlamasy aıasynda 223 shaqyrym jol qaıta jańǵyrtylady. 77 myń túp aǵash egiledi. Sondaı-aq, bıyl Semeı qalasynda 22 aýlany abattandyrý josparlanyp otyr. Onyń 11-i sol jaǵalaýda, 11-i oń jaǵalaýda. 8 qoǵamdyq oryn jańartylady. Bıyl oblys ortalyǵynda 210 avtobýs aıaldamasy ornatylady. 60 jańa avtobýs alamyz. Qala joldaryn tazalaý úshin merdiger kompanııalar qazirdiń ózinde túrli tıptegi 10 arnaıy tehnıka satyp aldy. Aldaǵy ýaqytta da kóshe tazalaıtyn tehnıkalardy alatyn bolamyz. Bıyl Semeıdegi 10, aýdandardaǵy 100-ge jýyq kósheni jaryqtandyramyz. Sondaı-aq, Semeıdegi jylý júıelerin jańǵyrtý maqsatynda 6 joba iske aspaq. Bul jylý tapshylyǵyn aıtarlyqtaı azaıtady. Demek, mektep, balabaqsha, turǵyn úıler, qonaqúıler men iri saýda oryndaryn salýǵa múmkindik týady, - dedi Berik Ýálı.

Óńir basshysy úndeý sońynda Abaı oblysynyń árbir turǵynye týǵan jerdiń tazalyǵyna, kórkeıýine birge úles qosýǵa shaqyrdy.

- Alyptar túlegen kıeli topyraqtyń ajaryna ár berý – árqaısymyzdyń qasıetti boryshymyz! Barshańyzdy jalpyóńirlik senbilikke belsendi qatysýǵa shaqyramyn. Bastamany barlyǵyńyz bir adamdaı qoldaıdy dep senemin. Bıyl kúzde siz bolyp, biz bolyp tazalyq aktsııasynyń jeńimpazdaryn birge anyqtaıyq. Endeshe, iske sát deımin. Bastamamyz berekeli bolsyn!», - dedi ol.

Osyǵan deıin Naýryz meıramy Abaı oblysynda keń kólemde, jańa formatta atalyp ótkenin jazǵan edik.