Berik Áshirbekov Shymkenttegi Turan aýdanyna ákim boldy
Shymkenttegi Turan aýdanyna jańa ákim taǵaıyndaldy, dep habarlaıdy Kazinform.
Búgin segizinshi shaqyrylymdaǵy Shymkent qalalyq máslıhatynyń kezekten tys onynshy sessııasy ótti. Kún tártibinde «Jergilikti memlekettik basqarý jáne ózin-ózi basqarý týraly» Zańynyń 10-babyna sáıkes Turan aýdanynyń ákimin taǵaıyndaý máselesi qaraldy. Máslıhat depýtattary atalǵan laýazymǵa Berik Aıdaruly Áshirbekovtiń kandıdatýrasyn bir aýyzdan qoldady.
Berik Aıdaruly Áshirbekov 1986 jyly Ońtústik Qazaqstan oblysy, Sozaq aýdany, Sholaqqorǵan aýylynda týǵan.
Sáken Seıfýllın atyndaǵy Qazaq ulttyq agrarlyq ýnıversıtetin jáne Qaraǵandy ekonomıkalyq ýnıversıtetin bitirgen. Mamandyǵy: jer kadastry jáne jyljymaıtyn múlikti baǵalaý jáne quqyqtaný.
Eńbek jolyn 2005 jyly Ońtústik Qazaqstan oblysy Sozaq aýdandyq jer kadastr bıýrosynyń tehnıgi, jerge ornalastyrýshysy bolyp bastady.
Keıinnen Ońtústik Qazaqstan oblysy Sozaq aýdandyq jer kadastry fılıalynyń dırektorynyń mindetin atqarýshy, Astana qalasynyń jer kadastry boıynsha ǵylymı óndiristik ortalyǵy memlekettik jer kadastry ortalyǵynyń ónerkásiptik-azamattyq maqsattaǵy jer ýchaskelerin rásimdeý bóliminiń bastyǵy, Petropavl qalalyq «Jer kadastry boıynsha ǵylymı óndiristik ortalyǵynyń» Respýblıkalyq memlekettik kásiporny dırektorynyń orynbasary bolyp eńbek etti. Sondaı-aq, Soltústik Qazaqstan oblystyq «Jer kadastry boıynsha ǵylymı óndiristik ortalyǵy» Respýblıkalyq memlekettik kásiporny fılıalynyń dırektory orynbasarynyń mindetin atqarýshy, Shymkent qalasy jer qatynastary bóliminiń óndiristik sektorynyń meńgerýshisi, Shymkent qalasynyń jer qatynastary bólimi basshysynyń orynbasary qyzmetterin atqardy.
Almaty qalasy Alataý aýdany ákiminiń orynbasary, Shymkent qalasynyń jer qatynastary basqarmasynyń basshysy, Shymkent qalasynyń sáýlet, qala qurylysy jáne jer qatynastary basqarmasy basshysynyń orynbasary, keıinnen basqarma basshysy boldy.
«TURKISTAN» arnaıy ekonomıkalyq aımaǵynyń Basqarýshy kompanııasy» AQ basqarma tóraǵasy, Shymkent qalalyq orta sapasy jáne baqylaý basqarmasynyń basshysy laýazymdaryn atqardy.
