Bergen Bespalınov: Ákimshilik kedergilerdi shekteý - aldymyzda turǵan mindet
«Elbasy «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty óziniń bıylǵy Joldaýynda halyqtyń ómir sapasyn arttyrýǵa baǵyttalǵan 6 naqty qadamdy atap ótti. Osy oraıda atalǵan mańyzdy qadamdardyń biri azamattarymyzdyń suranystaryna baǵyttalǵan memlekettik apparatty qurý boldy. Osy kúni QR Memlekettik qyzmet isteri jáne sybaılas jemqorlyqqa qarsy is-qımyl agenttigi elimizdiń barlyq óńirlerinde halyqpen sapaly jáne shuǵyl keri baılanysty qamtamasyz etýge baǵyttalǵan «Qoǵamdyq baqylaý kartasy» jobasyn júzege asyrýda. Aqmola oblysynyń turǵyndary úshin atalǵan joba iske qosylǵan ýaqytynan bastap-aq ótinim jiberýdiń ózindik bir «navıgatoryna» aınaldy», - deıdi B.Bespalınov.
Onyń aıtýynsha, «Qoǵamdyq baqylaý kartasy» jobasy aıasynda QR Memlekettik qyzmet isteri agenttiginiń Aqmola oblysy boıynsha departamentine osy kúnge deıin 90-nan astam ótinish kelip túsken. Olardyń deni jumystyń sapasyn arttyrýǵa baǵyttalǵan usynym sıpatyndaǵy habarlamalar.
«Bul óz kezeginde azamattardyń júzege asyrylyp jatqan sybaılas jemqorlyqqa qarsy saıasatqa belsendi aralasýynyń bir kórsetkishi. Aqmola oblysynda halyqpen keri baılanys júrgizý júıesiniń taǵy bir tıimdi jáne turaqty modeli óńirlik arnaıy monıtorıngtik toptar arqyly iske asýda. Óz ótinishin qaldyrýdy, ne bolmasa qandaı da bir máseleler boıynsha shuǵyl keńes alýdy qalaıtyn azamattar óz óńirindegi atalǵan toptyń múshelerine habarlasa alady. Sondaı-aq Nursultan Nazarbaev óz sózinde memlekettik qyzmetshilerge eńbekaqy tóleýdiń jańa júıesin engizýdiń joǵary nátıjeler kórsetkenin atap ótti. Jaǵymdy nátıjelerge qaramastan, tyndyrar is áli kóp. Elbasy atap ótkendeı, eń bastysy - olar muny tek jalaqyny kóbeıtý ǵana emes, bárinen buryn, jumystarynyń tıimdiligin arttyrý dep túsinýi kerek. Osy oraıda ol eńbekke tólenetin qarjynyń ósimi bıýdjet shyǵysyn, sonyń ishinde baǵynyshty mekemelerdiń shyǵystaryn ońtaılandyrý jáne únemdeý esebinen ótelýin baqylaýda ustaýdy tapsyrdy», - dedi departament basshysy.
B.Bespalınov atap ótkendeı, kórsetiletin memlekettik qyzmetter aıasynda memqyzmetshilerdiń turǵyndarmen tikeleı qarym-qatynasyn azaıtý sybaılas jemqorlyqty túbegeıli joıýǵa yqpal etpek.
«Memlekettik qyzmetterdi kórsetý úderisterin ashyq, al qyzmetterdiń ózin sapaly etý, sondaı-aq ákimshilik bógetterge shek qoıý - aldymyzda turǵan mindet. Osynyń barlyǵy túbinde sybaılas jemqorlyq táýekelderin joıýǵa jol ashady. Sonymen qatar Elbasy qaramaǵyndaǵy qyzmetkerler sybaılas jemqorlyqqa qatysty quqyqbuzýshylyq jasaǵan jaǵdaıda birinshi basshylardyń jeke tártiptik jaýapkershiligin kúsheıtý máselesin pysyqtaý qajet dep eskertti. Basshylar ózderiniń kásibı qyzmetinde ashyqtyq, qoljetimdilik jáne jarııalylyq saıasatyn ustanýy, sybaılas jemqorlyq táýekelderin joıýy, ujym ishinde merıtokratııa qaǵıdatynyń ustanýyn qamtamasyz etýi, bólek qyzmetshilerge qatysty qoldampazdyq pen birjaqty jaǵymsyz qatynastyń oryn alýyna jol bermeýi, memlekettik qyzmetterdi avtomattandyrý boıynsha sharalar qabyldaýy tıis. Búgingi Elbasynyń Joldaýy halyq arasynda keń qoldaýǵa ıe boldy. Bizdiń mindetimiz - qysqa ýaqytta atalǵan tapsyrmalardy júzege asyrý. Jarqyn bolashaǵymyzdy dostyqta, kelisimde jáne birlikti qurýdyń qajettigin túsinetin ýaqyt keldi. Sybaılas jemqorlyqpen kúresýde qoǵamnyń qoldaý kórsetýi budan da artyq nátıjelerge qol jetkizýge jáne álemniń damyǵan 30 memleketiniń qataryna kirýge óz septigin tıgizetinine kámil senimdimin», - dedi ol.
