«Berel» voleıboldan Qazaqstan chempıonatynda «Qýanyshty» utty

ÓSKEMEN. KAZINFORM — Óskemen qalasynda voleıboldan áıelderdiń ulttyq lıga komandalary arasynda ótip jatqan Qazaqstan chempıonatynyń ekinshi týrynda seısenbi kúngi matchtar máresine jetti.

Rıshat Gılıazýtdınov jattyqtyratyn «Berel» (Óskemen) óz alańynda mańyzdy kezdesýlerdiń birin «Qýanyshpen» (SQO) ótkizdi.

Keshe óskemendikter «Jetisý» (Taldyqorǵan) klýbynan jeńilip qalǵandyqtan, búgin alańǵa shıryǵyp shyqty.

Al Azamat Esimovtiń shákirtteri buǵan deıin qatarynan segiz ret jeńiske jetken edi.

Oıyndy soltústikqazaqstandyqtar sátti bastaǵanymen, óskemendikter tez jınala bildi — 25:23, 25:16. Degenmen tartysty ótken úshinshi jáne tórtinshi sette «Qýanysh» ese qaıyrdy — 28:26, 25:21. Biraq sheshýshi, besinshi partııada óskemendikter jeńisti julyp aldy — 15:11. Qorytyndy esep — 3:2.

Kósh bastap kele jatqan «Jetisý» el chempıony «Turandy» (Túrkistan) 3:0 (25:20, 25:19, 2520) esebimen tize búktirip, upaı sanyn 35-ke jetkizdi. 33 upaımen «Berel» ekinshi, «Qýanysh» (30 upaı) úshinshi orynda tur.

Tórtinshi satydaǵy «Qaraǵandy» elordalyq «Arý-Astanadan» aılasyn asyrdy — 3:0 (25:21, 25:14, 25:19). Qaraǵandylyqtardyń da 30 upaıy bar.

«Almaty» kósh sońyndaǵy Pavlodardyń «Ertisin» qapy qaldyrdy — 3:0 (25:14, 25:19, 25:13).

Dúısenbi kúni «Turanmen» kezdesýde oraldyq «Gratsııa KZ» komandasynyń negizgi oıynshylarynyń biri Elına Nadyrshına jaraqat alyp qaldy. Batysqazaqstandyqtar bul joly týrnır kestesinde altynshy orynda kele jatqan «Aqtóbege» ese jiberdi — 1:3 (23:25, 22:25, 25:18, 20:25).

Eske sala keteıik, budan buryn voleıboldan Qazaqstan chempıonatynda «Jetisýdyń» óskemendik «Berelden» qarymta qaıyrǵanyn jazǵan bolatynbyz.