Berdibek Saparbaevtyń Prezıdent Teleradıokeshenine bergen sońǵy suhbaty

ASTANA. QazAqparat – Búgin memleket jáne qoǵam qaıratkeri Berdibek Saparbaev ómirden ozdy. Memleket qaıratkeriniń sońǵy suhbaty bıylǵy aqpan aıynda Prezıdent Teleradıokesheninde jarııalanǵan edi. QazAqparat agenttigi Berdibek Saparbaevtyń osy suhbatynan úzindi usynady.

Suhbat barysynda Berdibek Máshbekulyna «jalpy osyǵan deıin shetel asqan zańsyz qarjy aktıvteri qazir Memleket basshysynyń tikeleı tapsyrmasymen elge qaıtarylyp jatyr. Osyǵan qatysty sizdiń jeke pikirińiz qandaı?» degen saýal qoıylady.

«Shetel asqan zańsyz qarjy aktıvterin elge qaıtarǵan durys. Óıtkeni, ol halyqtyń qarjysy, sondyqtan memlekettiń menshigine qaıtarylýy kerek. Memleket basshysynyń tikeleı tapsyrmasymen qurylǵan arnaıy komıssııa bar. Bas prokýratýra bastaǵan quzyrly organdar shetel asqan aktıvterdiń zańdylyǵyn tekserip, qaraýy kerek. Prezıdent shetelden qaıtarylǵan qarjyǵa mektepter men basqa da áleýmettik nysandar salamyz dedi, onysy jón. Halyqtyń másele nege tez sheshilmeıdi dep suraýy da durys», - dep jaýap berdi Berdibek Saparbaev.

Memleket qaıratkeriniń aıtýynsha, áleýmettik máseleler tek Qazaqstanǵa ǵana tán emes.

«Qaı memlekettik alsaq ta, tipti damyǵan AQSh nemese Eýropa elderin alaıyqshy - áleýmettik máseleler bárinde bar. Ony sheshýge ýaqyt jáne durys uıymdastyrý jumysy kerek. Qazir kóterilip jatqan máseleler halyqtyń ál-aýqatyn jaqsartýǵa arnalǵan. Ony jaýapkershilikpen oryndaý bılik ókilderine baılanysty», - deıdi B. Saparbaev.

Búgin belgili bolǵandaı Berdibek Saparbaev 70 jasynda ómirden ótti.

Memleket basshysy Berdibek Saparbaevtyń otbasy men jaqyn týystaryna kóńil aıtty.