Berdibek Saparbaev: Tabıǵı resýrstardy paıdalaný tıimdiligin arttyrý qajet
Sharaǵa onlaın rejımde qatysqan Qazaqstan Respýblıkasy Indýstrııa jáne ınfraqurylymdy damytý vıtse-mınıstri Rýslan Baımıshev, Qazaqstan Respýblıkasy Ekologııa, geologııa jáne tabıǵı resýrstar mınıstrligi geologııa komıtetiniń tóraǵasy Talǵat Satıev óz oılaryn ortaǵa saldy.
Rýslan Baımıshev bul kezdesý ózekti máselelerdi anyqtaýǵa jáne olardy sheshý joldaryn tabýǵa yqpal etetinin jetkizdi.
«Memleket kásiporyndarǵa qajetti qoldaýdy kórsetip otyr. Qoldanystaǵy zańnamaǵa sáıkes, jeńildetilgen tártippen Jambyl oblysynda paıdaly qazbalardy barlaýǵa 60 lıtsenzııa berilgendigin atap ótkim keledi. Kásiporyndardyń óz mindettemelerin ýaqtyly oryndaýy úshin monıtorıng júrgizý qajet. Mınıstrlik osy maqsatta kosmomonıtorıng júrgizýge nıetti», - dedi Rýslan Baımıshev.
Oblys ákiminiń orynbasary Almas Mádıev óńirdiń jer qoınaýyn paıdalaný jáne mıneraldyq-shıkizat bazasynyń jaı-kúıin tilge tıek etti.
Oblystaǵy fosforıtter qory jalpy respýblıkalyq kólemniń 72 paıyzyn, dala shpaty – 80,6 paıyzyn, altyn – 8,2, mys – úsh paıyzyn, ýran – 0,7, kómir – 21,1, qorǵasyn – 15,4, myrysh – 3,4, gıps – 25,8 paıyzyn quraıdy.
2020 jylǵy 1 qazandaǵy derekter boıynsha óńirde 320 jer qoınaýyn paıdalaný obektisi tirkelgen. 2019 jyldyń qorytyndysy boıynsha ınvestıtsııa kólemi 63,2 mıllıard teńgeni qurasa, bul 2018 jylmen salystyrǵanda 5,6 mıllıardqa artyq.
Jıynda jer qoınaýyn paıdalanýshylardynyń kelisimshart talaptaryn oryndaý qajettigine nazar aýdaryldy.
Sonymen birge 2019 jyly birqatar jer qoınaýyn paıdalanýshylar qatty paıdaly qazbalar boıynsha kelisimshart talaptaryn oryndamaǵan. Osy kompanııalarǵa shara qabyldaý úshin QR Indýstrııa jáne ınfraqurylymdyq damý mınıstrligine hat joldandy.
«Taǵy bir ózekti máseleniń biri – jergilikti jer qoınaýyn paıdalanýshylardyń óńirden tys jerde tirkelýi. Qatty, kómirsýtekti paıdaly qazbalarǵa, jerasty gaz qoımasyna jasalǵan 50 kelisimsharttyń tek segizi ǵana oblysta tirkeýde tur. Sondaı-aq 9 jer qoınaýyn paıdalanýshy óz fılıaldaryn oblysqa tirkegen. Qalǵan 33 kelisimshart boıynsha kompanııalar óńirde áli kúnge deıin tirkelmegen. Barlyq kásiporyndar bizdiń oblysta tirkelýi qajet. Olar óńirdiń ekonomıkalyq damýyna óz úlesin qosýy tıis» - dedi oblys ákimi.
Aımaq basshysy iri kásiporyndar jergilikti jerdegi shaǵyn jáne orta bıznesti qoldaýǵa jáne olardyń óndirgen ónimderin paıdalanýǵa shaqyrdy.
Kezdesýde kompanııa ókilderi de sóz aldy. «Qazfosfat» JShS Bas dırektory Muqash Eskendirov , «EvroHım-Qarataý» JShS baqylaý keńesiniń múshesi Erkebulan Myrzaǵalıev óndiristik kórsetkishter, áleýmettik mindettemelerdiń oryndalýy, jumys oryndaryn qurý, salyq aýdarymdary týraly áńgimeledi.
«Monterra Qazaqstan» JShS baqylaý keńesi tóraǵasynyń orynbasary Nurlan Seıdáli, «Myńaral Tas Kompanı» JShS dırektory Murtaza Bulýtaı da óz kásiporyndarynyń jumysy týraly aıtyp berdi.
«Bizdiń elimiz óz jer qoınaýynyń baılyǵy men alýan túrliliginiń arqasynda shıkizatqa baı derjavalardyń qatarynda kósh basynda keledi. Tabıǵat baılyǵymen Jambyl oblysy da maqtana alady. Óńirdiń áleýeti tolyq ıgerilýi tıis. Aımaqtyń áleýmettik-ekonomıkalyq damýy úshin bul baılyqty aqylmen paıdalaný qajet», - dep qorytyndylady oblys ákimi.
Aıta keteıik, kezdesý «Qazfosfat» JShS bazasynda ótti. Seriktestiktiń bas dırektory Muqash Eskendirov oblys ákimine zaýyt jumysy týraly baıandap, mıneraldy tyńaıtqyshtar óndirisin jylyna 500 myń tonnaǵa jetkizý úshin zaýyttyń ekinshi kezeńiniń qurylysy týraly málimdedi.
Berdibek Saparbaev zaýyttaǵy tsehtar men qoımalardy aralap kórdi.
