Berdibek Saparbaev oblys ákimi bolyp taǵaıyndalýyna qatysty pikir bildirdi

NUR-SULTAN. QazAqparat – Qordaı oqıǵasy saldarynan keltirilgen shyǵyn kólemi taıaý kúnderi jarııa etiledi. Bul týraly búgin Úkimet otyrysynan keıin Jambyl oblysynyń ákimi Berdibek Saparbaev aıtty, dep habarlaıdy QazAqparat tilshisi.

«Ókinishke qaraı, ázirshe, keltirilgen shyǵyn kólemin aıta almaımyn. Jumys toby jumys istep, zardap kelgen barlyq turǵyn úılerdi, saýda núktelerin zerdelep jatyr. Taıaý kúnderdiń ishinde biz keltirilgen shyǵyn kólemin jarııa etemiz. Sodan keıin Úkimetke usynys engiziledi. Buǵan qosa, búgin atap ótkenimdeı, atalǵan óńirden shyqqan kásipkerlermen, bıznesmendermen zardap shekkenderge kómektesý máselesin de sóılesip jatyrmyz», - dedi Jambyl oblysynyń ákimi.

Berdibek Saparbaev Prezıdent tapsyrmasyna sáıkes, Jambyl oblysynyń Qordaı aýdanynda bolǵan jaǵdaıǵa baılanysty qurylǵan komıssııanyń tóraǵasy bolyp qalatyndyǵyn, jumys jalǵasatyndyǵyn atap ótti. Sonymen qatar ol Jambyl oblysynyń ákimi bolyp taǵaıyndalýyna qatysty pikir bildirdi.

«Ony sheshetin Memleket basshysy. Memleket basshysy osyndaı sheshim qabyldaǵannan keıin men ony oryndaýǵa mindettimin. Kezinde mınıstr bolsam, qazir ákim retinde Jambyl oblysynda oryn alǵan oqıǵa saldaryn tezirek joıýǵa qatysty jumys isteımiz»,- dedi ol.