Berdibek Saparbaev Qordaı aýdanynyń aqsaqaldarymen kezdesti
Aımaq basshysymen birge aýdanǵa oblystyq quqyq qorǵaý organdarynyń basshylary da ilesip bardy.
Oblys ákimi Qarakemer aýylynyń aqsaqaldary qatysqan jıynda aýdandaǵy ahýal turaqtalǵanyn, kúndelikti tirshilik qalypty deńgeıde jalǵasyp otyrǵandyǵyn atap ótti. Kóktemgi dala jumystaryna daıyndyq barysyn barlap, aýa raıynyń qolaılylyǵyn paıdalanyp abattandyrý sharalaryn bastaý kerektigin tilge tıek etti.
Aýyl jastarynyń bos ýaqytyn tıimdi uıymdastyrý – aǵa býyn ókilderiniń basty mindeti. Oblys ákimi kórshiles aýyl jastarynyń birlese qatysýymen túrli mádenı-sporttyq is-sharalardy uıymdastyrýdyń mańyzdylyǵyna toqtaldy. Osy oraıda Berdibek Saparbaev úlgi retinde kúrd dıasporasy qalyń shoǵyrlanǵan Talas aýdanynyń Qasqabulaq aýylyn mysalǵa keltirdi. Ol aýylda sońǵy bes jylda birde-bir quqyq buzýshylyq tirkelmegenin, ataýly áleýmettik kómek (AÁK) alýshylardyń múlde joqtyǵyn, turǵyndardyń materıaldyq jaǵdaılary da oıdaǵydaı ekendigin tilge tıek etti. Sonymen qatar, aýyldaǵy barlyq mańyzdy sheshimderdi aqsaqaldar keńesi qabyldaıtynyn atap ótti.
Ardager Tóle Súgirbaev jergilikti aýrýhanany kadrlarmen jáne medıtsınalyq jabdyqtarmen qamtamasyz etýge, gaz tartýǵa qol ushyn berýdi surady.
«Áleýmettik túıtkilder, onyń ishinde kógildir otynmen qamtamasyz etý máselesi óz sheshimin tabady. El Prezıdenti Qordaı aýyldaryndaǵy problemalar týraly habardar. Bul turǵyda tıisti mınıstrliktermen tyǵyz jumys isteý kerek», - dep atap ótti aımaq basshysy.
Masanshy jáne Sortóbe aýyldarynyń aqsaqaldarymen áńgimelesken Berdibek Saparbaev jergilikti turǵyndardy qalypty jaǵdaıda ómir súrýge shaqyryp, zań aıasynda qoǵamdyq tártip barynsha saqtalatyndyǵyna toqtaldy. Kókeıdegi suraqtary men shaǵymdaryn arnaıy kelgen oblystyq prokýratýra, UQK jáne polıtsııa departamentteri basshylary aldynda aıtýǵa bolatyndyǵyn jetkizdi.
Jergilikti sharýalar Shý aýdanynda kókónis daqyldaryn egýdi, qolda bar azyq-túlik qoryn oblys aýmaǵyndaǵy bazarlarda satýdy tıisinshe jalǵastyra berýin basa aıtty.
Masanshy aýylynyń turǵyny Ishar Loý búgingi jaǵdaıdyń turaqty ekenin, adamdar óz úılerine oralyp, balalar sabaqqa baryp júrgendigine nazar aýdartty. Ol balalardyń ózara qarym-qatynasyn nyǵaıtý úshin qazaq jáne orys tilderinde oqytatyn aralas mektepterdi ashý týraly usynys bildirdi. Áıelder keńesi men aqsaqaldar sotynyń qurylǵandyǵyn habarlap, ol qoǵamdyq tártip pen qaýipsizdikti qamtamasyz etý jónindegi jumysty utymdy úılestirgeni úshin ákimdik pen quqyq qorǵaý organdaryna alǵysyn aıtty. Sondaı-aq, Ishar Loý jastardy arandatqan jáne áleýmettik jelilerde alaýyzdyqqa úndegen adamdardy anyqtap, shara qoldanýdy surady.
Oblys ákiminiń turǵyndarmen kezdesýlerinde barlyq jumystar men sharalar zań aıasynda iske asý kerektigi basa aıtyldy.
«Biz barlyǵymyz zań aldynda birdeımiz. Ony kez kelgen adam ulty men dinı nanymyna qaramastan birdeı saqtaýǵa tıis. Zańdy buzǵandar qatań túrde jaýap beretin bolady. Kez kelgen jaǵdaıda ulttyq qundylyqtar men tárbıe negizderine júginý qajet. Sol kezde ǵana qoǵamdyq tártip, yntymaq ornaıdy», - dedi Berdibek Saparbaev.
Aýdandaǵy jumys saparynyń sońynda oblys ákimi Sortóbe aýylynda tótenshe jaǵdaıdy joıý jónindegi shtab otyrysyn ótkizdi. Onda aýyl ákimderine jergilikti turǵyndarmen jáne qoǵam belsendilerimen únemi baılanysta bolýdy, týyndaǵan máselelerge jedel den qoıýdy, jumyspen qamtý jáne jastardyń bos ýaqytyn uıymdastyrýǵa aıryqsha nazarda aýdarýdy eskertip, naqty tapsyrmalar júktedi.
