Berdenovke oq atylǵan myltyq elordada esepten shyǵarylǵan
ASTANA. KAZINFORM – Іshki ister mınıstri Erjan Sadenov Shymkent ákiminiń eks-orynbasary Rýslan Berdenovke oq atylǵan myltyqtyń elordada esepten shyǵarylǵanyn rastady.
- Iá, ókinishke qaraı mundaı jaıt boldy. Bireýler birdeńeni satqany emes, qyzmetkerlerdiń nemquraılyǵy bolǵan. Qazirgi ýaqytta qylmystyq is qozǵaldy jáne tergeý aıasynda biz barlyq mán-jaıdy, ıaǵnı joıý ornyndaǵy kinálini, kim satqanyn anyqtaımyz. Bul suraqtardyń bárine jaýap beremiz, - dedi Erjan Sádenov Májilistiń jalpy otyrysynan keıin BAQ ókilderiniń saýalyna oraı.
Budan buryn Rýslan Berdenovke jasalǵan qastandyq týraly is sotqa joldanǵanyn jazǵan bolatynbyz.
21 sáýirde Shymkent ákiminiń orynbasary Rýslan Berdenovke qastandyq jasalǵany málim bolǵan. Ol jaraqat alyp, aýrýhanaǵa tústi.
Sot úkimimen oǵan oq atqan Ernar Jıembaı 9 jylǵa bas bostandyǵynan aıyryldy.
29 tamyzda Rýslan Berdenov óziniń ótinishi boıynsha Shymkent qalasy ákiminiń orynbasary qyzmetinen ketkeni belgili boldy.