BELTA basshysy: Memleketke óz qyzmeti týraly aqparat taratatyn senimdi arna kerek

ASTANA. QazAqparat - Sochıde TMD Memlekettik aqparat agenttikteri basshylarynyń keńesiniń (TMD Aqparat keńesi) XXIII otyrysyna shyǵarmashylyq yntymaqtastyqty damytý baǵyttary men keler jylǵa arnalǵan birlesken jobalar talqylandy. TMD Aqparat keńesi 1995 jyly qarasha aıynda qurylǵan. Onyń quramyna Ázerbaıjan, Armenııa, Belarýs, Qazaqstan, Qyrǵyzstan, Moldavııa, Reseı jáne Tájikstannyń memlekettik jańalyqtar qyzmetiniń jetekshileri kiredi. Belarýs telegraf agenttiginiń (BELTA) bas dırektory Dmıtrıı Jýk «QazAqparat» HAA tilshisine bergen suhbatynda ózi basqaratyn aqparat agenttiginde qoldanylatyn jańa tehnologııalar men BAQ-tyń Belarýstegi bedeli týraly  aıtyp berdi.

Belarýs telegraf agenttigi TMD aýmaǵyndaǵy jáne alys shet elderdegi jetekshi BAQ-tarmen aýqymdy seriktestik baılanystar ornatqan. Ózara árekettestik pen kooperatsııa - qashanda tıimdi.

Bizdiń oıymyzsha, BELTA men QazAqparat» HAA arasynda aıtarlyqtaı tyǵyz ári jemisti yntymaqtastyq ornady jáne birneshe jyldan beri damyp keledi. Belarýs pen Qazaqstanda ótken mańyzdy sharalardy jarııalaýda bir-birimizge qoldaý kórsetemiz. Túrli medıajobalarǵa qatysamyz. Onyń jarqyn mysaly retinde kópjaqty agenttikaralyq ınformerdi aıta alamyn. Onda BELTA men QazAqparattan bólek, AZERTADJ, Trend, Kabar men Hovar engen.

Qatysýshy agenttikterdiń saıttaryndaǵy jańalyqtyq habarlamalardy jyldam jarııalaıtyn bul júıe 2016 jyly iske qosylǵan. Informerdiń negizgi maqsaty - seriktesterdiń redaktorlyq qyzmetterin qajet etpeı, jańalyq mazmunyna esh ózgeris engizbeı, menshikti jáne túpnusqadaǵy kontentti sheteldik medıaalańdarǵa shyǵarý.

Bul platforma jumysy ózara tolyq kásibı senimge negizdelgen. QazAqparatty, sózsiz, ınternet keńistigindegi senimdi seriktesimiz jáne jyldam aqparat kózi dep esepteımiz. Bul vırtýaldy BAQ pen áleýmettik jelilerdiń qarqyndy damý ǵasyrynda erekshe qundy bolmaq.

Ekinshi jaǵynan, álbette, yntymaqtastyqtyń áleýeti áli tolyq ashylǵan joq. QazAqparatpen birlesip, kóp nárseni júzege asyrǵymyz keledi. Atap aıtqanda, EAEO-daǵy ıntegratsııany damytý, jańa Jibek Jolynyń ekonomıkalyq beldeýi jáne mádenı-gýmanıtarlyq saladaǵy ózekti taqyryptar boıynsha naqty jobalardy júzege asyratyn ıdeıalar men múmkindikter bar.

- Jaqyn arada nemese jalpy qandaı ıdeıalar men jobalardy júzege asyrý kózdelip otyr?

- Biz únemi jańa ıdeıalarmen jumys isteımiz. Júzege asyrylǵan bir jobany ekinshisi almastyrady.  Ózderińiz biletindeı, medıa salasynyń ózi  - uzaq úzilis pen toqyraýǵa tózbeıtin qaınaǵan tirshilik.

Qazirgi ýaqytta agenttiktiń áleýmettik jelilerdegi qyzmetin keńeıtýge jáne vızýaldy kontent úlesin kóbeıtýge kóńil bólip otyrmyz.  Odan bólek, BELTA iri taqyryptyq ınternet-jobalar ázirlep jatyr. Olardyń biri Belarýstegi ІІ Eýropa oıyndaryna arnalǵan.

Sonymen birge, BELTA-nyń 100 jyldyǵyna qyzý daıyndyq ústindemiz. Shyn máninde, tutas 2018 jyl biz úshin mereıtoılar jyly bolǵaly tur. Kóptegen qyzyqty jáne túrli pishindegi sharalardy ótkizý qarastyrylǵan, olarǵa seriktesimiz «QazAqparatty» da qatystyrý josparda bar. 

- Memlekettik aqparat agenttikteri úshin erekshe mártebe - qajettilik pe álde kóp artyqshylyqtardyń biri me? Resmı úkimettik aqparattardy jarııalaýda BELTA-da monopolııa bar ma?

- Dál osyndaı quqyq Belarýs telegraf agenttigine 1995 jyldyń 10 qazanynda Belarýs Respýblıkasy Prezıdentiniń N413 jarlyǵymen berilgen. Sonymen qatar, resmı sıpattaǵy aqparatty qosqanda, jalpy aqparatqa monopolııa múmkin emes. Biraq, memleketke óz qyzmeti týraly jańalyq taratatyn, kommertsııalyq nemese saıası yqpaldarǵa berilmeıtin, tekserilgen, senimdi arnalar kerek.

Sońǵy jyldary medıanaryqta básekelestik paıda boldy, aqparattyq aǵyndar da qarqyndy ulǵaıa tústi - mundaǵy áńgime tek Belarýs týraly emes. Halyqtyń da tekserilgen naqty aqparatqa degen suranysy artyp keledi. Sol sebepti memlekettik agenttikterdiń erekshe mártebesi qalady: olar senimdi ári jyldam aqparattyń kózi jáne sheneýnikter men saıasatkerlerdiń, bıznesmender men qarapaıym turǵyndardyń obektıvti sheshim qabyldaýyna negiz bola alady.