Belgili sportshy jaýapty qyzmetke taǵaıyndaldy
AQTAÝ. KAZINFORM – Mańǵystaý oblystyq Sambo federatsııasy prezıdentiniń buıryǵymen óńirlik Sambo federatsııasynyń sporttyq dırektory retinde halyqaralyq dárejedegi sport sheberi Suńǵat Manarbekuly taǵaıyndaldy.
Óńirlik Sambo federatsııasy baspasóz qyzmetiniń habarlaýynsha, baıraqty báskelerde top jaryp, elimizdiń kók baıraǵyn ózge elde kóterip, Ánuranymyzdy shyrqatyp júrgen Suńǵat Jubatqan endi sambony damytýǵa kúsh salmaq. Ol 1998 jyly Mańǵystaý aýdanynyń ortalyǵy Shetpe kentinde dúnıege kelgen.
Suńǵat Jubatqan dzıýdadan Azııa, Eýropada ótken týrnırlerdiń, sondaı-aq, Qazaqstan birinshiliginiń birneshe dúrkin jeńimpazy. Dúnıejúzilik ýnıversıada oıyndary men álem kýbogynyń qola júldegeri, halyqaralyq dárejedegi sport sheberi. Sambodan QR chempıonatynyń birneshe dúrkin chempıony jáne Azııa chempıony. Álem chempıonatynyń kúmis jáne qola júldesiniń ıegeri.
Mańǵystaý oblystyq Sambo federatsııasynyń atqarýshy dırektory Ashat Qapanov Suńǵat Jubatqanǵa federatsııanyń sporttyq dırektory ekenin rastaıtyn qujatty tabystady.
Budan bólek, QR Sambo federatsııasynyń quryltaıshysy, óńirlik sambo federatsııasynyń prezıdenti men vıtse-prezıdenti Suńǵat Jubatqandy jańa qyzmette berilgen tapsyrmalardy abyroımen atqaratynyna senim bildirdi.
