Belgili kınorejısser Slambek Táýekel ómirden ótti
ASTANA. KAZINFORM – Belgili kınorejısser, stsenarıst, Qazaqstannyń eńbek sińirgen qaıratkeri, «Qurmet» jáne «Qurmet belgisi» ordenderiniń ıegeri Slambek Táýekel ómirden ótti.
Qaraly habar týraly Mádenıet jáne aqparat mınıstrligi baspasóz qyzmeti málim etti.
Slambek Tileýqabyluly – qazaq kınoóneriniń damýyna eleýli úles qosqan kórnekti tulǵa. Tarıhı-kórkem fılmderdiń birqataryn dúnıege ákelgen kásibı rejısser, bilikti stsenarıst ári prodıýser retinde ulttyq rýhanııattyń órkendeýine eńbek sińirgen óner qaıratkeri. Sonymen qatar Qazaq ulttyq óner ýnıversıtetinde uzaq jyldar ustazdyq qyzmet atqaryp, jas mamandardyń tárbıesine de zor úles qosty.
Otandyq kıno tarıhynda, óner men mádenıet shejiresinde jarqyn iz qaldyrǵan ardaqty azamattyń ǵıbratty ǵumyry halqynyń jadynda máńgilik saqtalady.
Slambek Táýekel 1948 jyly 2 sáýirde Pavlodar oblysynda dúnıege kelgen.
Búkilodaqtyq kınematografııa ınstıtýtyn bitirgen ol eńbek jolyn «Qazaqfılm» kınostýdııasynda bastaıdy. 1973-1974 jyldary Qazaq KSR Memlekettik kıno komıtetiniń bólim meńgerýshisi bolyp eńbek etedi. 1974-1990 jyldary «Qazaqfılm» kınostýdııasy dırektorynyń orynbasary, birinshi orynbasary, dırektory, Qazaq KSR Memlekettik kınematografııa jónindegi komıteti tóraǵasynyń orynbasary bolǵan.
Rejısser ótken ǵasyrdyń toqsanynshy jyldarynyń basyn shyǵarmashylyq jumysqa arnaǵan. Slambek Táýekeldiń ataqty «Batyr Baıan» fılminiń ómirge kelýi de osy shaqqa tuspa-tus keledi. Batyr Baıannyń ómiri jaıly kópshilik aqyn Maǵjan Jumabaıulynyń jyrlary arqyly tanys. Aqynnyń óleńin týyndyǵa ózek etip, tarıhı faktilerdi tereń aqtarǵan rejısserdiń fılmin kórermen qaýym jyly qabyldady.
Budan keıingi kezeńderde ár jyldary «Qazaqkınofest» aktsıonerlik qoǵamynyń teń tóraǵasy, QR Memlekettik mádenıet jáne ónerdi qoldaý qorynyń atqarýshy dırektory, «Qazaqstan teledıdary jáne radıosy» RK» jabyq AQ-nyń bas prodıýsseri, basqarma tóraǵasynyń birinshi orynbasary, 2004-2005 jyldary - Qazaqstan Respýblıkasy Mádenıet, aqparat jáne sport mınıstrligi Aqparat jáne muraǵat komıtetiniń tóraǵasy qyzmetterin atqardy.
El ishindegi ózekti máselelerge ún qosyp júrgen rejısserdiń derekti fılm salasynda da qorjyny bos emes. «Armysyń, Naýryz!», «Bizdiń kıiz úı», «Terrordyń qanquıly izderi», «Asanáli», «Sátbaev» jáne basqa da derekti fılmderi moıyndalǵan.