Belgili fototilshi Saılaý Pernebaevtyń «Aq pen qara» kitaby jaryq kórdi
Elordadaǵy Ulttyq akademııalyq kitaphanada qazaqstandyq fotojýrnalıstıkanyń negizin qalaýshylardyń biri, belgili fototilshi Saılaý Pernebaevtyń «Aq pen qara» kitabynyń tusaýkeseri ótti, dep habarlaıdy QazAqparat tilshisi.
Tusaýkeserge mınıstrlik ókilderi, belgili qalamgerler, aqyndar, depýtattar men fotograftyń otbasy músheleri qatysty.
«Aq pen qara» kitaby fotojýrnalıstiń 85 jyldyǵyn atap ótý aıasynda jaryq kórdi. Atalǵan eńbekke Saılaý Pernebaevtyń osydan 60 jyl buryn túsirgen tańdaýly sýretteri endi.
«Saılaý aǵamyzdyń 60 jyl buryn túsirgen sýretteri nazarlaryńyzǵa usynylyp otyr. Ol kisiniń muraǵaty óte baı. Alǵashqy kitapqa aǵamyz túsirgen sýretterdiń 25-30 paıyzy ǵana endi. Ekinshi eńbek suranyp tur. Ol qazir jınaqtalyp jatyr. Fotolar negatıv nusqasynda saqtalǵan. Qazir olardy uly Erbol Saılaýuly tsıfrlyq nusqaǵa kóshirip jatyr», - dedi belgili fotojýrnalıst Asylhan Ábdiraıymuly.
Sharada sóz alǵan Senat depýtaty Nurtóre Júsip qazaq halqynyń bútin bir dáýiri Saılaý Pernebaevtyń obektıvi arqyly sýrettelgenin atap ótti.
«Saılaý Pernebaev taspalaǵan fotolardy kórip otyryp, sonaý dáýirlerge saıahattap kelgendeı boldyq. Qazaq tulǵalarynyń ár qyry, ár sáti aǵamyzdyń janarynan qalys qalmaǵan eken. Erkin, syrty da, ishi de sulý kisi edi», - dep eske aldy QR Parlamenti Senatynyń depýtaty Nurtóre Júsip.
Kitaptyń tusaýkeserimen qatar, kórme uıymdastyryldy. Kelýshiler nazaryna fototilshiniń biregeı týyndylary usynyldy.
Aıta keteıik, Saılaý Pernebaev birneshe márte Qazaqstan jýrnalıster odaǵynyń jáne respýblıkalyq komıtettiń syılyǵymen marapattaldy. Ǵumyrynyń 40 jyldan astamyn osy salaǵa arnaǵan, qazaqstandyq fotojýrnalıstkasynyń qalyptasýyna óz úlesin qosqan tulǵa.
