Qazaq kınosynyń «Qojasy» dúnıeden ótti

ASTANA. KAZINFORM — Qazaqstannyń eńbek sińirgen qaıratkeri, belgili akter, stsenarıst, kınodramatýrg, «Meniń atym Qoja» fılmindegi basty róldi somdaǵan Nurlan Segizbaev ómirden ozdy. 

Mádenıet jáne aqparat mınıstrligi Qazaqstannyń eńbek sińirgen qaıratkeri Nurlan Segizbaevtyń ómirden ozýyna baılanysty otbasy men jaqyn týystaryna, týǵan halqyna qaıǵyra kóńil aıtty.

— Nurlan Sanjaruly — qazaq mádenıeti men óneriniń damýyna eleýli úles qosqan tulǵa. Ol óz ǵumyryn shyǵarmashylyqqa, ulttyq rýhanııatqa arnap, keıingi urpaqqa ónege bolatyn mol mura qaldyrdy. Ónersúıer jurtshylyqqa áli kúnge qundylyǵyn joımaı kele jatqan Abdolla Qarsaqbaevtyń «Meniń atym Qoja» fılmindegi basty rólimen tanymal óner ıesi qazaq kıno ónerindegi dara tulǵa boldy. Onyń ekranda jasaǵan kórkem beıneleri otandyq óner tarıhynda aıryqsha oryn alady. Nurlan Sanjarulynyń jarqyn beınesi, shyǵarmashylyq murasy men ǵıbratty ǵumyr joly halqymyzdyń jadynda máńgi saqtalady dep senemiz. Marqumnyń jany jánnatta, ımany salamat, topyraǵy torqa bolǵaı, — delingen vedomstvo habarlamasynda.

Budan buryn kıno jáne teatr akteri, rejısser, pedagog, professor, Qazaq KSR jáne KSRO halyq ártisi Asanáli Áshimov 88 jasynda ómirden ótkenin jazǵanbyz.