Belgili ǵalym Qubyǵul Jaryqbaev ómirden ótti

ALMATY. QazAqparat - Pedagogıka jáne psıhologııa ǵylymdarynyń doktory, professor, Qazaqstannyń eńbek sińirgen ǵylym jáne tehnıka qaıratkeri Qubyǵul Bozaıuly Jaryqbaev dúnıe saldy. Bul týraly ál-Farabı atyndaǵy QazUÝ fılosofııa kafedrasy Ǵacebook paraqshasynda jazdy, dep habarlaıdy QazAqparat tilshisi.

«Ál-Farabı atyndaǵy Qazaq ulttyq ýnıversıteti fılosofııa jáne saıasattaný fakýlteti, fılosofııa kafedrasynyń ujymy pedagogıka jáne psıhologııa ǵylymynyń doktory, professor, QR Eńbek sińirgen ǵylym jáne tehnıka qaıratkeri, otandyq psıhologııa ǵylymynyń qulabyzy, fılosoftardyń da jańa býynyn qalyptastyryp, Farabıtanýǵa zor úles qosqan ǵalym Qubyǵul Bozaıuly Jaryqbaevtyń ómirden ótýine baılanysty ul-qyzdaryna, týǵan-týys baýyrlaryna, jaqyndaryna qaıǵysyna ortaqtasyp, kóńil aıtady. Marqumnyń jany jánnatta, ımany salamat bolsyn!» dep jazylǵan jelide.

Qubyǵul Bozaıuly 1929 jyly Aqtóbe oblysy Alǵa aýdany Kókbulaq aýylynda dúnıege kelgen.

1946 jyly Aqtóbe muǵalimder ınstıtýtyn jáne 1951 jyly QazMÝ-di bitirgen.

1951-1958 jyldar aralyǵynda Qyzylorda pedagogıkalyq ınstıtýtynda assıstent, 1958-1977 jyldar aralyǵynda Shymkent pedagogıkalyq ınstıtýtynda aǵa oqytýshy, dotsent, kafedra meńgerýshisi, 1977-1987 jyldary QazMÝ-de dotsent, kafedra meńgerýshisi boldy.

1987 jyldan QazUÝ-de professor, 1998 jyldan etnopedagogıka jáne etnopsıhologııa ortalyǵynyń dırektory qyzmetterin atqardy.

Ǵylymı-zertteý jumystarynyń negizgi baǵyty: Qazaqstandagy psıhologııalyq jáne pedagogıkalyq oı-pikirlerdiń damý tarıhy, etnopsıhologııa máseleleri.

Ol Alash qaıratkerleriniń psıhologııalyq jáne pedagogıkalyq muralary jóninde birqatar ǵylymı eńbekter jazǵan.