Belarýsten mańǵystaýlyq sarbazdyń súıegi ákelinedi

AQTAÝ. QazAqparat - Búgin Aqtaýda Ekinshi dúnıejúzilik soǵystaǵy Jeńistiń 72 jyldyǵy qurmetine merekelik shara ótti, dep habarlady «QazAqparat» HAA tilshisi.

Merekelik shara «Urpaqqa uran bolǵan erlik!» atty soǵysta qaza tapqandardyń eskertkishine gúl shoqtaryn qoıý rásiminen bastaldy.

 «9 mamyr muńly kún, alaıda sonymen qatar júregimizde baǵasy ólsheýsiz jarqyn mereke. Jantúrshigerlik soǵystyń aıaqtalǵanyna 72 jyl ótti. Jeńis qanshama kóz jasymen, qaıǵymen keldi. Surapyl soǵys mıllıondaǵan adamnyń ómirin qıdy. Qansha taǵdyrdy jarymjan etti, qalalardy qıratty.  (...) Biz Máńgilik alaýdyń aldyna ardagerlerdi eske alyp, beıbit ashyq aspan úshin alǵys bildirip, olardyń aldarynda basymyzdy ııýge keldik», - dedi oblys ákimi Eraly Toǵjanov.

Mańǵystaý oblysynan Fort-Shevchenko qalasyndaǵy jalǵyz komıssarıattan maıdanǵa 6 myńǵa jýyq adam ketti, onyń ishinde 170 qyz bar, 4800 jerlesimiz oralmady... Batyrlarymyz Mádı Bedıanov, Bilál  Qalıev,   Kýrsk  shaıqasyna qatysqan Torsynbaı Qaraqulov, barlaýshy Malaev  Pavel, Ómirzaq Nurbaev  pen basqalary altyn árippen  soǵys jylnamasyna jazyldy.   

Oblys delegatsııasy ardagerler keńesi hatshysy tóraǵasynyń basshylyǵymen Belarýste Mozel qalasynda saltanatty sharalarǵa qatysty. Onda mańǵystaýlyq sarbaz batyr Jubaly Qaldyqaraevqa qurmet kórsetildi, mańǵystaýlyqtar onyń súıegin otanyna ákelmek.