Belarýs elinde Astananyń 20 jyldyǵy atap ótildi

MINSK. QazAqparat - Mınskide Astana qalasynyń 20 jyldyǵyna arnalǵan saltanatty qabyldaý ótti. Oǵan Belarýs Respýblıkasy Syrtqy ister mınıstriniń birinshi orynbasary Andreı Evdochenko, depýtattar, mınıstrlikter men vedomstvolardyń ókilderi, dıplomatııalyq mıssııalardyń basshylary, iri kásiporyndardyń basshylary, jetekshi ǵalymdar, Belarýstiń mádenıet qaıratkerleri, qazaq dıasporasynyń ókilderi jáne taǵy basqalary qatysty. Bul týraly QR Syrtqy ister mınıstrliginen málim etti, dep habarlaıdy QazAqparat.

Qazaqstannyń Belarýs elindegi Elshisi Ermuhamet Ertisbaev Astana qysqa merzimde salynǵan HHІ ǵasyrdyń jalǵyz astanasy ekendigin jáne Qazaqstan ǵasyrdyń basynda jańa elordany salǵan jalǵyz el bolǵanyn atap ótti. Jańa astananyń damýy búkil Qazaqstandy túbegeıli ózgertip, ony ekonomıkalyq jáne saıası turǵydan turaqty memleket, jaýapty jáne bedeldi halyqaralyq serikteske aınaldyrdy.

A.Evdochenko óz sózinde jańa elordany salý ıdeıasyn usynyp, ony júzege asyrǵan Qazaqstannyń Tuńǵysh Prezıdenti - Elbasy Nursultan Nazarbaevtyń rólin erekshe atap ótti. El Prezıdentiniń Astanany damytýǵa únemi nazar aýdarýy jáne alańdaýshylyǵy ony Eýrazııadaǵy serpindi damyp kele jatqan megapolıske, qazirgi zamanǵy jáne básekege qabiletti qalaǵa aınaldyrǵanyn aıtyp ketti.

Іs-shara barysynda Astana qalasyna arnalǵan fotokórme jáne beınebaıandar kórsetildi.