Belgııada jastar arasyndaǵy jappaı tártipsizdikten keıin qaýipsizdik sharalary kúsheıtildi

BRıÝSSELЬ. QazAqparat – Jumadan senbige qaraǵan túni Belgııanyń Ýpeıe mýnıtsıpalıtetinde jastar tártipsizdik uıymdastyrdy. Oǵan polıtsııa tergeýi barysynda jas adamnyń mert bolýy sebep bolǵan, dep habarlaıdy QazAqparattyń menshikti tilshisi.

Belgııa basylymynyń deregi boıynsha, juma kúni tústen keıin 31 jastaǵy kvadrotsıkl júrgizýshisi tekseristen ótýden bas tartyp, jergilikti polıtsııa patrýlinen qashyp ketýge tyrysqan. Ary qaraı jas júrgizýshi Opeıedegi Perro kóshesinde polıtseılerdiń birin qaǵyp ketken. Tártip saqshylarynyń ekinshisi jedel áreket etip, oǵan tabeldik qarýmen oq atqan. Zardap shegýshi jaralanyp, aýrýhanaǵa jetkizildi.

Kvadrotsıkl júrgizýshisi alǵan jaraqattarynan ońalmaı, qaıtys boldy. Bul oqıǵa jastardyń narazylyǵyn týdyryp, tún ishinde polıtsııamen birneshe qaqtyǵys jáne vandalızm bolǵan. Jaǵdaı senbi kúndiz turaqtaldy. Soǵan qaramastan, jergilikti mer mýnıtsıpalıtet aýmaǵynda tórt adamnan artyq jınalýǵa tyıym saldy.

Sonymen qatar «ortaq joldarda adam jınalyp qalǵan jaǵdaıda polıtsııanyń qadaǵalaýyna ruqsat etiledi». «Áleýmettik jelilerde tekserilmegen aqparat kóp. Ol osy oqıǵaǵa qatysy bar qyzmetker men jalpy polıtsııaǵa jek kórý sezimin týdyrýǵa baǵyttalǵan. Osyǵan baılanysty tergeý júrip jatyr. Biz azamattarymyzdy tynyshtyq saqtap, múlik pen adamdardyń qaýipsizdigin qorǵaýǵa shaqyramyz. Biz sot tóreligine óz qyzmetin atqaryp, shyndyqty ashýǵa múmkindik berýimiz qajet», - delingen Ýpeıe meriniń málimdemesinde.