Belgııa fýtbol quramasynyń psıhologynyń testinen de ótýge týra keldi – qazaqstandyq Eýropadaǵy jumys jaıly
Otandasymyz Aslan Moldanııazov Belgııadaǵy qazaqstandyqtar qaýymdastyǵynyń uıymdastyrýymen ótetin fýtbol jarysynyń belsendi qatysýshysy, ol japondyq «Terumo» kompanııasynyń sol aımaqtaǵy basshysy.
Osy oraıda QazAqparattyń menshikti tilshisi jerlesimiz Aslan Moldanııazovtyń Belgııadaǵy ómiri, kompanııadaǵy jetistigi týraly áńgime órbirip, suhbat alǵan edi.
- Aslan, Eýropanyń ortasynda ornalasqan Belgııaǵa qashan jáne qalaı keldińiz?
- Otbasymyzben 2019 jyly Belgııaǵa kóship keldik. Úsh uldan keıin tórtinshi sábıimiz qyz dúnıege keldi. Osy kezde maǵan jumys boıynsha usynys tústi. Jubaıym ekeýmiz usynysty qabyldap, Belgııaǵa kóshý kerek dep sheshtik. Sebebi jumys usynǵan kompanııanyń bas keńsesi sonda ornalasqan edi.
Qyzymyz eki aıǵa tolǵanda, men jumys isteıtin japondyq «Terumo» kompanııasynda «fılıal menedjeri», ıaǵnı Shyǵys Eýropa, Ortalyq Eýropa, Baltyq jaǵalaýy, TMD, Mońǵolııa, Izraıl jáne Malta elderi boıynsha bas menedjer laýazymy bos boldy. Bul dıstrıbıýtorlyq klasterge kiretin óte úlken aımaq.
- Jaýapty laýazym ǵa jetý úshin syna qtan qalaı óttińiz? Qıynǵa soqpady ma?
- Laýazymǵa irikteýde talap joǵary boldy. Іrikteýdiń 12 kezeńinen ótýge týra keldi. Sonyń ishinde Belgııa fýtbol quramasynyń psıhology, talanttardy anyqtaý jónindegi kásibı agent, odan bólek EMEA kompanııasynyń aımaqtyq prezıdenti jáne vıtse-prezıdentimen kezdesý kerek boldy.
Bizdiń kompanııa kadrlar baıqaýyna syrttan qadaǵalaıtyn sarapshy retinde belgııalyq mamandy shaqyrdy. Al Belgııa quramasynyń psıhology meniń psıhologııalyq, kóshbasshylyq daǵdylaryma, jumysqa daıyndyǵyma, sonyń ishinde stresstik jaǵdaıdaǵy is-qımyldaryma baǵa berdi.
Іrikteýdiń birneshe kezeńi men suhbattardan keıin maqsatyma jaqyndaı tústim. Básekelestik joǵary boldy. Laýazymdy qyzmetti ıelený úshin Eýropa, Taıaý Shyǵys, Azııadan úmitkerler keldi. Kandıdattardyń ishinde eń jasy men boldym. Ol kezde mende atalǵan laýazymǵa qol jetkizý úshin talap etiletin MBA nemese kandıdattyq dıssertatsııam da bolǵan joq.
Aqyr sońynda, jaýapty laýazym maǵan buıyrdy. Kompanııa prezıdentimen jeke suhbattan keıin meni álemniń 30 eli boıynsha kompanııanyń bas menedjeri qyzmetine taǵaıyndady.
- Belgııada ǵy ómirińiz jaıly aıtyp berseńiz, munda sizge ne unaı dy?
- Birinshiden, men jumys isteıtin qyzmetime jaqsy aqsha tólenedi. «Terumo» kompanııasy - Japonııada alǵash bolyp ishki naryqqa termometr shyǵara bastaǵan iri óndirýshi. Bul onkologııa, júrek-qan tamyrlary jáne perıferııalyq salalarda medıtsınalyq ónimder shyǵaratyn úzdik kompanııalardyń biri.
Belgııadan kóp áser aldym. Belgııa úkimeti aılyqty, sonyń ishinde jeke sektordaǵy qyzmetkerler jalaqysyn da ındeksteýdi rettep otyrǵan Eýropadaǵy sanaýly eldiń biri ekenin atap ótkim keledi. Bul ásirese Eýroodaqtaǵy joǵary ınflıatsııa turǵysynan ózekti.
Qazir meniń komandam úlken. 30 dıstrıbıýtor, sol sııaqty Leven qalasyndaǵy jáne basqa elderdegi 37 kásibı keńse mamany bar.
Komandada Italııa, Horvatııa, Chehııa, Shveıtsarııa, Serbııa, Ýkraına, Qazaqstan, Reseı, Baltyq elderiniń ókilderi bar. Ár túrli ult pen mádenıetten quralǵan halyqaralyq top deýge bolady.
Biz satýmen, marketıngpen, terapııany, bıznesti, logıstıkany, qarjylyq bólimdi, zańdastyrý taǵy sol sııaqty máselelerdi damytýmen aınalysamyz.
Otbasyma da Belgııada turǵan unaıdy. Menińshe, bul elde balalarǵa degen erekshe kózqaras qalyptasqan. Jubaıym da jergilikti qoǵamǵa tez beıimdeldi, sondaı-aq qazaq qyzdary arasynda netvorkıngti belsendi túrde ilgeriletip keledi. Nýtrıtsıologııa, otbasylyq tamaqtaný boıynsha óz isin júrgizedi, frantsýz tilin meńgerip, ártúrli deńgeılerinen sátti ótip jatyr, sportpen aınalysady.
Mysaly, Astanada turǵanda balalarymyzdyń únemi qoly tımeı júretin. Kúnine eki ret hokkeı, shahmat, matematıka jáne taǵy sol sııaqty jattyǵý nemese qosymsha sabaqqa baratyn.
Munda da balalar mektep úıirmelerine qatysady, biraq Belgııada yńǵaıly rejım. Mysaly, keıbir sabaqtar onlaın ótedi. Fýtbol, basketbol, djıý-djıtsý sekildi sportqa kóp mán beriledi.
Belgııada memlekettik mektep tegin, balalarym frantsýz tilinde oqıdy. Memlekettiń áleýmettik qoldaýyn baıypty dep aıtar edim.
Belgııada zeınetaqy júıesi, ıpotekalyq baǵdarlamalar, 3%-ǵa deıin avtonesıe berý jaqsy jolǵa qoıylǵan.
- Áriptesterińiz ben basshylyqtyń qazaqstandyq mamandarǵa kózqarasy qandaı?
- Óte jaqsy. Men kompanııadaǵy alǵashqy qazaqstandyq boldym. Kompanııa prezıdenti kýbogyn birneshe ret jeńip aldym. Bul kompanııada ótetin baıqaý. Jeńimpazdarǵa jubaıyn ertip, kompanııanyń joǵarǵy basshylyǵymen jáne olardyń otbasy múshelerimen birge álem elderine VIP-saparǵa barýǵa múmkindik beriledi.
Kompanııa basshylyǵyna Qazaqstannyń qatty áser etkeni sonshalyq, 2017 jyly olar sheberlik klýbyn ótkizý úshin bizdiń elimizdi tańdaýdy uıǵardy. Sardınııada úlken ekranda qazaq mýzykasy, dástúrleri men týrıstik, mádenı oryndary týraly vıdeo kórgenim esimde. Oǵan deıin men prezıdent kýbogynda bir ret jeńistiń dámin kórgen edim. Osy sátte taǵy jeńiske jetýdi maqsat ettim. Óıtkeni Qazaqstanǵa álemniń túkpir-túkpirinen úzdik mamandardy aparýdy joǵary mártebe sanadym.
Sheteldik qonaqtar bizdiń tamasha týrıstik oryndar Sharyn shatqaly, Úlken Almaty kóli sııaqty basqa da jerlerge bardy.
Jalpy, iri kompanııalardyń kópshiliginde eshqandaı kemsitý, alalaý degen atymen joq ekenin atap ótkim keledi. Bir-birimizben jaqsy til tabysamyz, men arasynda eń jasymyn ári eýropalyq emespin, alaıda eshqashan eshqandaı kemsitý bolǵan emes.
Áriptesterim Qazaqstan týraly jaǵymdy áserde qalǵanyna senimdimin. Bizde úlken ambıtsııasy bar, bilimdi, aqyldy jáne belsendi adamdar jetkilikti. Alǵa umtylyp, órshil maqsattar qoıatyn jastar da kóp. Eýropada qazaqstandyqtardy ádemi, aqyldy ult retinde qabyldaıdy dep oılaımyn.
Sondaı-aq, kóptegen sheteldikter Qazaqstanǵa barǵan kezde bizdiń tabıǵatymyzdy, landshaft, týrıstik oryndardy kórip, ol jerlerdiń álemde tanymal emestigine tań qalady.
Qazaqstandy - baǵa, mádenıet, kórikti jerler men qyzmet kórsetý jaǵynan «jumaq» dep aıtýǵa bolady.
- Aslan, tabysqa jetýge umtylatyn jas qazaqstandyqtarǵa qandaı keńes berer edińiz?
- Aldymen mansapta nemese bızneste naqty josparlaýǵa keńes beremin. Jaqsy josparlaý tabysqa jetýdiń 50% quraıdy. ıAǵnı negizgi aspektiler boıynsha bir jylǵa naqty maqsattar qoıý kerek. Alǵa qoıǵan maqsattardy óz ishinde ártúrli klasterlerge bólińiz. Óz basym baqytty adam bolý úshin barlyq salada baqytty bolý kerek dep sanaımyn. Bul degenimiz otbasy, mansap, qarjylyq ál-aýqat, sport, mádenıet jáne ózin-ózi tárbıeleý.
Meniń jubaıymnyń, balalarymnyń da óz maqsattary bar. Jyl saıyn aldymyzǵa Smart júıesi boıynsha jańa maqsattar qoıamyz. SMART ádisine sáıkes maqsat naqty, ólshenetin, qol jetkizýge bolatyn, ózekti jáne shekteýli ýaqyt bolýy kerek.
Máselen, bul frantsýz tiliniń jańa deńgeıine jetý, aıtalyq, B-1-den B-2-ge deıin kóterilý. Belgili bir emtıhan tapsyrý, qandaı da bir týrnırde jeńiske jetý, osynsha aqsha tabý, bonýstar alý jáne taǵy basqa.
Ekinshiden, uzaq merzimge josparlaǵan jón. Qazir men IE Business School, UCLA Anderson, Singapore Management University-de Sıngapýrdan Los-Andjeleske deıingi 5 elge arnalǵan jahandyq baǵdarlama boıynsha «executive MBA» alyp jatyrmyn. Jumys berýshi Latyn Amerıkasyna jáne basqa da jahandyq rólderge naqty jospar quryp, maǵan ınvestıtsııa salady. Men «Bolashaq CEO», ıaǵnı bolashaqta kompanııany basqaratyndar klýbyna qatysamyn. Osynyń bári tastóbeden túse salǵan tosynsyı emes, bul naqty ár qadamdy ólshep, josparlaǵan dúnıeler.
Meniń jasym 36-da. Al atalǵan klýb músheleri 45 jastan asqandar, sondyqtan meni qaýymdastyqqa «erejeden tys» jaǵdaıda kirgizip otyr.
Damý josparymdy jazǵan kezde, men 20 jyldan keıin búkil kompanııanyń «CEO» (menedjeri) bolamyn dep josparladym. Bul degenimiz álem boıynsha 20 myńnan astam qyzmetker, aınalymy birneshe mıllıard eýro.
Uzaq merzimdi maqsatqa jetkizetin jol uzaq. Ol úshin maǵan jahandyq tájirıbe qajet, álemniń ártúrli aımaǵynda jumys isteýim kerek.
Sonymen qatar, men qazir jumys isteıtin baǵyt boıynsha ǵana emes, ártúrli departamentterde jumys isteýim qajet. Men qaıda, qandaı maqsatqa qol jetkizgim keletinin bilemin, sondyqtan oǵan jeter joldy da josparlap qoıamyn. Ol úshin joǵary deńgeıdegi quzyretter qajet. Sol úshin ózime qajet jańa daǵdylardy úırený úshin arnaıy qosymsha kýrstarǵa barýǵa tyrysamyn.
Úshinshi másele - tez úırený jáne beıimdelý. Bul qazirgi ýaqytta óte mańyzdy. Sebebi kóptegen mamandyqtar, jahandyq pozıtsııalar qazirdiń ózinde qajet bolmaı qaldy nemese jaqyn arada mańyzyn joǵaltady. Sizdiń qanshalyqty qatardan qalmaı tez beıimdeletinińiz ózekti.
Meniń Qazaqstanda ár túrli bıznesim boldy. Tabystysy da, onsha júrmeı qalǵan bıznesim de boldy. Biraq siz kompanııada da jumys istep mansap pen baılyqqa qol jetkize alasyz.
Bizge keıbir qalyptasqan stereotıpter kedergi bolýy múmkin. Mysaly, Eýropada qazaqstandyqtardy qabyldamaýy múmkin degen sekildi taptaýryn oı. Bul - múldem qate kózqaras. Bizdi de basqa adamdarmen birdeı qabyldaıdy. Siz qaıdan kelseńiz de báribir. Shyndyǵynda, bunyń bári - óz sanamyzdaǵy kedergiler, ony ońaı jeńýge bolady.
Sondyqtan jas otandastarymyz aýqymdy maqsattar qoıyp, naqty ne istegisi keletinin túsinýi kerek. Buıyrǵany osy dep otyrmaı, óziniń qalaǵan isimen aınalysqan jón. Kópshiligimiz «osylaı istegen durys qoı» degen paradıgmada ómir súremiz.
Sen jumysyńdy jaqsy kórip, túsinýiń kerek. Álemdi sen ǵana kún saıyn ózgertip otyrasyń. Eger men muny shyn máninde qalaımyn dep jumysqa kirisseń, alynbaıtyn qamal joq.
Qorytyndylaı kele, Qazaqstandaǵy oqyrmandarǵa mynany aıtqym keledi. Sheteldegi jeke kásibı jetistikterimniń bárine Otanymdaǵy otbasym men jaqyndarymnyń qoldaýynyń arqasynda qol jetkizdim.
Birinshi kezekte ata-anamnyń arqasy. Qazaqtyń balasy retinde ómirimde kóp qoldaý bildirgen ata-anama árdaıym qaryzdarmyn ári olardy qatty qurmetteımin.
Bizdiń jetistikterimizdiń artynda ata-anamyzdyń eńbegi jatyr. Ákem men anam sovet zamanynan medıtsına salasynda eńbek etti, orta deńgeıli tabys tapty. , men qandaı bilim alamyn degen másele týyndaǵanda olar ómir boıy bar jıǵan-tergenin maǵan jumsady.
Mektep bitirgen soń aldymen Qazaqstandaǵy aldyńǵy qatarly memlekettik ýnıversıtetterdiń birine «hımııa» mamandyǵy boıynsha grantqa túsken edim. Biraq ata-anam KIMEP-tiń aqyly bólimine túsirdi. Osylaısha meniń bolashaǵyma úlken kómek jasady.
- Suhbatyńyzǵa raqmet !
