Bekzat Altynbekov: Aýyl ákimderin saılaý – demokratııalyq qoǵam qurýǵa jasalǵan mańyzdy qadam

JEZQAZǴAN. QazAqparat – Qaraǵandy oblysynda, onyń ishinde Jezqazǵan óńirinde saılaý naýqany qarqyndy júrýde. Jalpy, óńirde aýyl ákimderin saılaý 13 aýylda, 17 kentte jáne 45 aýyldyq okrýgte 14 saılaý ýaskesinde ótýde, dep habarlaıdy QazAqparat tilshisi.

Jezqazǵan qalasy Talap aýyldyq okrýginde ákim saılaýy tańǵy 07.00-de bastalyp ketti. №240 saılaý ýchaskesinde karantın talaptary qatań saqtalǵan. Komısııa músheleri arnaıy qorǵanysh kıim kıip, betperde taǵynǵan. Aýyl turǵyndary ara-qashyqtyqty saqtaı otyryp, daýys berýde.

«Búgin - elimiz úshin tarıhı kún. Qazaqstan Respýblıkasynyń Prezıdenti Qasym-Jomart Kemeluly Toqaevtyń bastamasymen tuńǵysh ret aýyl ákimderin halyqtyń tikeleı saılaýy ótýde. Bul saıası naýqan - dúıim jurt úshin asa mańyzdy qadam», - deıdi Jezqazǵan qalasyndaǵy Qaraǵandy oblystyq Qazaqstan halqy Assambleıasy Qoǵamdyq kelisim keńesiniń tóraǵasy Bekzat Altynbekov.

Halyqtyń saılaýǵa qatysýǵa degen belsendiligi joǵary. Sońǵy málimetterge sáıkes, Talap aýyldyq okrýginde 102 saılaýshy daýys berdi, bul ýchaskedegi saılaýshylar sanynyń 20,31%-yn quraıdy.

«Aýyl ákimderin saılaý – elimizde demokratııalyq qoǵam qurýǵa jasalǵan mańyzdy qadam. El Prezıdenti 2020 jylǵy 1 qyrkúıektegi halyqqa Joldaýynda aýyl ákimderin tikeleı saılaýdy engizý qajettigi týraly aıtqan bolatyn. Qasym-Jomart Toqaev 2021 jylǵy 25 mamyrda «Qazaqstandaǵy saılaý týraly« Konstıtýtsııalyq zańǵa túzetýlerge qol qoıdy. Memleket basshysy ózi aıtqandaı, bul rasynda qoǵamymyzdyń demokratııalyq damý jolyna nyq qadam basqanynyń aıqyn kórinisi. Búgingi saılaýdyń qortyndysy boıynsha úlken ózgerister jáne áleýmettik máseleler óziniń sheshimin tabady dep esepteımin. Osy saıası doda Qazaqstan halqyn biriktirip, el úmitin aqtaıtynyna kámil senemiz. Sondyqtan, biz osy saılaýdan úlken úmit kútemiz», - dep qosty Bekzat Altynbekov.