Bekzad Nurdáýletov bokstan álem kýbogynda altyn aldy

ASTANA. KAZINFORM - Astanada ótip jatqan World Boxing aıasyndaǵy álem kýbogynda Bekzad Nurdáýletov (85 keli) altyn medal aldy. 

Jartylaı fınalda Bekzad úndistandyq Djýgnýmen qolǵap túıistirdi. Alǵashqy raýndta ol qarsylasyn nokaýtqa túsirdi. Ekinshi raýnd ta Bekzadtyń basymdyǵymen aıaqtaldy. Sheshýshi raýndta da ol syr bergen joq.

Nátıjesinde qazaqstandyq boksshy álem kýbogynyń altynyn aldy.

B. Nurdáýletov 1999 jyly dúnıege kelgen. 2019 jyly álem chempıony ataǵyn jeńip alsa, 2024 jyly Azııa chempıonatynda jeńis tuǵyryna kóterildi. 2020 jyldan beri kásipqoı boksta da sharshy alańǵa shyǵyp júr.

Al Nurbek Oralbaı (80 keli) fınalda frantsııalyq Iojerlen Sezarǵa ese jiberdi. 

Nurbek Oralbaı 2024 jylǵy Parıj Olımpıadasynyń kúmis júldegeri boldy. Oǵan qosa 2018 jylǵy jastar arasyndaǵy álem chempıony atansa, 2022 jyly Azııa oıyndarynda qola medal enshilegen.

Endi fınalda Alýa Balqybekova (51 keli), Vıktorııa Grafeeva (60 keli), Natalıa Bogdanova (70 keli), Sanjar Táshkenbaı (50 keli), Nadejda Rıabets (75 keli), Sabyrjan Aqqalyqov (75 keli), Eldana Tálipova (80 keliden joǵary), Aıbek Oralbaı (90 keliden joǵary) altyn júldeni sarapqa salady. 

Eske salsaq, budan buryn Nazym Qyzaıbaı (48 keli) alǵashqy altyndy qorjynǵa saldy.

Al Mahmýd Sabyrhan (55 keli) jekpe-jek ótkizbesten chempıondyq ataqqa qol jetkizdi. Onyń qarsylasy Rýı ıAmagýchı sharshy alańǵa shyǵýdan bas tartty.
Al el quramasynan Ertýǵan Zeınýllınov (65 keli), Aıdana Zabynbekova (57 keli), Aıda Ábikeeva (65 keli), Saǵyndyq Toǵambaı (90 keli) qola júldeni qanaǵat tutty.
Álem kýbogy jyl boıyna birneshe kezeńmen ótkiziledi. Reıtıngilik saıysta ár salmaq dárejesinde jeńimpazǵa 300, ekinshi orynǵa 200, qos qola júldegerge 150 upaıdan beriledi.

Álem kýbogy 30 maýsym men 6 shilde aralyǵynda ótedi.