«Bekire –2020» aktsııasy: Zańsyz aýlanǵan 14 tonna balyq tárkilendi

ATYRAÝ. QazAqparat – Elimizdegi Mańǵystaý, Atyraý jáne Batys Qazaqstan oblystarynda «Bekire –2020» balyq qorǵaý aktsııasy kezinde 13,9 tonna balyq zańsyz aınalymnan alyndy, dep habarlaıdy QazAqparat.

Atyraý oblystyq orman sharýashylyǵy jáne janýarlar dúnıesi aýmaqtyq ınspektsııasynyń resmı ókili Olek Týshkanovtyń málimetinshe, atalǵan aktsııa kezinde 759 quqyq buzýshy ákimshilik jaýapkershilikke tartylǵan.

Sondaı-aq, 33 qylmystyq is qozǵalǵan. Sonyń nátıjesinde 13 mln teńge aıyppul salynǵan.

«Zańsyz saýda aınalymynan 13,9 tonna balyq alyndy. Onyń ishinde 943,9 keli bekire tuqymdas balyq bar. Sonymen birge, 16,34 keli qara ýyldyryq, 439 aý jaraǵy, 119 júzý quraly tárkilendi» -deıdi Oleg Týshkanov.

Eske sala ketelik, budan buryn Atyraý polıtsııasy jarty tonnadan astam bekire tıelgen kólikti ustady.