Bek Air kompanııasynyń taǵdyry 20 qańtarda sheshiledi
«Komıssııamen sóılestim jáne kelesi dúısenbide Bek Air bolashaǵyna qatysty túpkilikti kesimdi kútýge bolady. Atalǵan áýe kompanııasynyń sertıfıkaty (IOSA sertıfıkaty) bolmasa da ushaqtardy paıdalana berýin jalǵastyrýy bul kompanııada birdeńeniń durys bolmaǵandyǵyn dáleldeıdi. Sondyqtan da áýe kompanııasynyń qalaı jumys istegendigine qatysty tergeýdi bastaý týraly sheshim qabyldadym. Qysqa ǵana ýaqyttyń ishinde 2 tosyn oqıǵa boldy jáne bul - alańdatarlyq jaıt. Biz bul áýe kompanııasy avıatsııalyq qaýipsizdiktiń barlyq talaptaryn qalaı saqtaǵanyn jáne munyń barlyǵyn qalaı baqylaǵandyǵyn tekserýge tyrysamyz», - dedi Pıter Grıffıts suhbat barysynda.
Aıta keteıik, «Bek Air» Qazaqstannyń avıatsııalyq ákimshiligin paıdalanýshy sertıfıkatyn qabyldanǵan sheshim týraly habardar etpeı jáne sebebin kórsetpeı toqtatty dep aıyptaǵan bolatyn. Osy aıyptaýǵa jaýap bergen Qazaqstannyń avıatsııalyq ákimshiligi paıdalanýshy sertıfıkatynyń qoldanylýyn toqtata turýǵa «Fokker-100» ushaǵynyń apaty sebep bolǵanyn aıtqan.
«Bul týraly 2019 jylǵy 27 jeltoqsanda «Bek Air» AQ atyna jiberilgen RD270510 radıogrammasynda tikeleı kórsetilgen. Mundaı sheshim «Qazaqstan Respýblıkasynyń áýe keńistigin paıdalaný jáne avıatsııa qyzmeti týraly» Zańǵa sáıkes qabyldandy. Onda sertıfıkattyń qoldanylýy ushý qaýipsizdigine tikeleı qater tóndiretin zańnama talaptarynyń eleýli buzylýy anyqtalǵan kezde shekteletini kórsetilgen. Sondaı-aq bul shara joǵaryda kórsetilgen qaǵıdalardyń talaptaryn negizge alady. Oǵan sáıkes ýákiletti uıym paıdalanýshy sertıfıkattyq talaptar men shekteýlerdi saqtamaǵan jaǵdaıda paıdalanýshy sertıfıkatynyń qoldanylýyn toqtata turady» delingen taratylǵan aqparatta.
