Bedeýlik deńgeıi nelikten 16-17% túspeı tur – reprodýktologtyń jaýaby
ALMATY. KAZINFORM – Qazaqstanda bedeýlik deńgeıi 16-17% paıyz. Bul týraly Qazaqstan reprodýktıvti medıtsınasynyń XVI Halyqaralyq kongresi barysynda Vıacheslav Lokshın málim etti.
Belgili otandyq ǵalym, qazaqstandyq reprodýktıvti medıtsına qaýymdastyǵynyń prezıdenti Vıacheslav Lokshınniń aıtýynsha, qazir ortasha eseppen bedeýlik jıiligi – 17 paıyz jáne bul kórsetkishtiń ózdiginen azaıý úrdisi baıqalmaıdy.
Dıagnostıkanyń qazirgi zamanǵy ádisteriniń damýy bedeýliktiń naqty sebepterin anyqtap, ony emdeý joldaryn izdeýge kómektesedi. Bedeýliktiń 40%-daı jaǵdaıy erlerdiń reprodýktıvti júıesi jumysyna baılanysty. Al aralas bedeýliktiń jıiligi 30%-dy kórsetedi.
«Alǵashqy jyldary bala aldyrý aıtarlyqtaı tómendegenimen, qazirgi ýaqytta bul kórsetkish turaqty jáne kópshilik kontratseptsııany jetkilikti túrde qoldanbaıdy. Sondyqtan bedeýlik deńgeıi 16-17% deńgeıinde saqtalyp tur. Erler bedeýligi, áıelder bedeýliginiń sebepteri arasynda jynystyq jolmen beriletin ınfektsııalardan bolatyn qabyný aýrýlary, aborttar jáne basqa da faktorlar bar», - dedi Vıacheslav Loshkın.
Professor reprodýktıvtik júıeniń buzylýyn boldyrmaý máseleleriniń mańyzdylyǵyn atap ótti. Jynystyq tártiptilikti saqtaý, erte dıagnoz qoıý, otbasyn durys josparlaý, antıvırýs gormonyn tekserý qajettigin atap ótti.
2021-2024 jyldar aralyǵynda elimizde 27 myńnan astam ekstrakorporaldy uryqtandyrý (EKU) jasaldy. 1 qarashadaǵy jaǵdaı boıynsha Qazaqstanda «Ańsaǵan sábı» baǵdarlamasy aıasynda 9 myńnan astam bala dúnıege kelse, 2 myńǵa jýyq áıel júkti retinde esepte tur.
Aıta keteıik, Almatyda ótken halyqaralyq kongreske elimizdiń jetekshi ǵylymı jáne klınıkalyq ortalyqtarynyń basshylary, akýsher-gınekolog dárigerler, EQU ortalyqtarynyń ókilderi, bedeýlikti emdeıtin andrologtar, endokrınologtar, embrıologtar, hırýrgtar, genetıkter jáne molekýlalyq bıologtar – Qazaqstannyń, Grýzııanyń, Reseıdiń, Belarýstiń, Ózbekstannyń, Qyrǵyzstannyń, AQSh-tyń, Serbııanyń, Izraıldiń, Italııanyń, Germanııanyń, Túrkııanyń jáne Rýmynııanyń jetekshi mamandary qatysty.
Osyǵan deıin 2025 jyly birneshe medıtsınalyq anyqtama elektrondy túrde beriletini týraly jazǵan edik.
